InfoHub Logo

دۋلات باباتاي ۇلى (1802، شىعىس قازاقستان وبلىسى اياگوز اۋدانى ساندىقتاس قونىسى – 1874، سوندا قايتىس بولعان) – كورنەكتى اقىن. ولەڭدەرى ەل ىشىندە كوپ تاراعان. دۋلات شىعارمالارى نەگىزىنەن ديداكتيكالىق نەگىزدە جازىلعان. ولەڭدەرى ەل ىشىنە اۋىزشا جانە قولجازبا تۇرىندە تارالعان. كەيبىر ولەڭدەرى قازان قالاسىنان 1880 جىلى العاش رەت “وسيەتناما” دەگەن اتپەن جەكە كىتاپ بولىپ جارىق كورگەن. جيناققا اقىننىڭ سول كەزەڭدەگى قازاق ەلىنىڭ ساياسي-الەۋمەتتىك ءومىرىن شىنشىلدىقپەن جىرلاعان وي-تولعانىستارى ەنگەن. اقىننىڭ كەيبىر ولەڭدەرى كەڭەس داۋىرىندە ءار ءتۇرلى حرەستوماتيالاردا، كەيىن “ءۇش عاسىر جىرلايدى” جيناعىندا باسىلىپ شىقتى. ال، “ەسپەمبەت” پوەماسى العاش رەت 1957 جىلى “جۇلدىز” جۋرنالىنىڭ 5-نومىرىندە جاريالاندى. دۋلاتتىڭ ولەڭ-جىرلارىنىڭ باستى سارىنى – 19 عاسىردىڭ العاشقى جارتىسىنداعى وتارشىلدىق ارەكەتتەرگە رۋحاني قارسىلىق كورسەتۋ. اقىن ولەڭدەرىندە قازاق جەرىنىڭ وتارلانۋىن، ەل بيلەۋشىلەردىڭ وتارشىل ساياساتتىڭ شىلاۋىندا كەتۋىن كەكتى دە وتتى جىر جولدارىنا اينالدىرعان. تۋعان حالقىنىڭ ەكى جاقتى ەزگىگە ءتۇسىپ، كوز جاسىنىڭ كول بوپ اعۋى، قايعىسى مەن مۇڭى اقىننىڭ جان سىرى رەتىندە جىر بولىپ توگىلدى. 1947 جىلعى قكپ وك-نىڭ ادەبيەت، ونەر جونىندەگى قاۋلىسىنداعى دۋلاتتى ءدىنشىل، حاندىق ءداۋىردى، ەسكىلىكتى اڭساۋشى كەرتارتپا اقىن دەگەن تەرىس باعادان كەيىن، 1959 جىلى وتكەن قازاق ادەبيەتىنىڭ نەگىزگى پروبلەمالارىنا ارنالعان عىلىمي كونفەرەنسيانىڭ ۇسىنىستارىندا دۋلات جونىندە “... تۆورچەستۆوسىن ورتا مەكتەپتە وقىتۋ قاجەتسىز دەپ سانالسىن”، - دەگەن ساياسي قورىتىندى بەرىلدى. سول سەبەپتى “اباي” رومانىندا ءوز اتىمەن بەرىلگەن دۋلات “اباي جولىندا” بارلاس اتانىپ كەتە بەردى. ايتسە دە، دۋلات شىعارمالارى حرەستوماتيالىق وقۋلىقتاردا، كەيبىر جيناقتاردا جاريالانىپ كەلدى.

دۋلات باباتاي ۇلىنىڭ شاعارمالارى: cىلتەمە

---