InfoHub Logo

بۇنى مەديسينا تىلىمەن پسورياز دەپ اتايدى. تەمىرەتكى كوبىنە تەرىنىڭ، تىرناقتاردىڭ جانە بۋىنداردىڭ تۇقىم قۋالايتىن سوزىلمالى، ءبىراق جۇقپالى ەمەس اۋرۋى. ول جۇيكەنىڭ قاتتى كۇيزەلىستەردەن كەيىن پايدا بولادى. دۇرىس تاماقتانباۋ، اسقازان-ىشەك اۋرۋلارىنا شالدىعۋ، الكوگولگە ۇيىرلىك، باۋىر، ۇيقى بەزدەرىنىڭ دە اۋرۋلارى پسوريازدى ورشىتە تۇسەدى. اۋرۋ كۇز جانە قىس ايلارىندا داميدى دا جازدا باسەڭدەيدى.

پسورياز العاش رەت 18-30 جاستا پايدا بولادى، قارتايا كەلە ءبىر جەرگە ورنىعادى نەمەسە جوعالادى.

تەرىنىڭ كەز كەلگەن جەرى تەمىرەتكىمەن زاقىمدانۋى مۇمكىن، كوبىنە تەرىنىڭ ۇدايى ۇيكەلەتىن جەرلەرىندە بولادى. تەرىدە ءىرىڭسىز بورتپەلەر (پاپۋلالار) پايدا بولىپ، ولار بىر-بىرىنە قوسىلىپ، ءىرى ءتۇيىنداقتارعا اينالادى. ولاردىڭ سىرتىندا اق ءتۇستى، وڭاي سىدىرىلاتىن قابىرشاقتارى بولادى. قابىرشاقتاردىڭ ءتۇسى كۇمىس ءتۇستى دە بولادى، ونى سىدىرىپ العان كەزدە جىلتىر قىزىل داقتار بايقالادى. ولاردان ۇساق قان تامىر نۇكتەلەرى كورىنەدى. بۇلاردىڭ ءبارى دە وسى تەمىرەتكىگە ءتان بەلگىلەر. تەمىرەتكىدە تىرناقتار قالىڭداپ، سارعايادى، تىرناق ءوزىنىڭ تابيعي جىلتىرلىعىن جوعالتادى. اندا-ساندا الاقان مەن تابان دا زاقىمدانادى.                  

اۋرۋ بىرتىندەپ، باياۋ داميدى. كەيدە بارلىق تەرى مەن بۋىندار زاقىمدانادى، مۇندايدا ول تەز دامي باستايدى. وسىنداي كلينيكالىق ءارتۇرلى پسورياز ەپيترودەرميا دەپ اتالادى. سىرقات ۇزاققا سوزىلادى جانە اۋىر بولادى، تەرى تارتىلىپ اۋىرادى، ناۋقاس قالتىرايدى، دەنەسى قىزادى. سوندىقتان مۇنداي اۋرۋى بار ناۋقاستار دەرماتولوگتىڭ باقىلاۋىندا ءجيى بولىپ، ونىڭ الدىن الۋ شارالارىن جاساپ وتىرۋى كەرەك. كەيبىرەۋلەرى تەز جازىلادى، ۇزاققا سوزىلاتىن كەزدەرى دە، قايتالاناتىن كەزدەرى دە بولادى.

ەمى

ەمدى دارىگەر-دەرماتولوگ، ياعني تەرى اۋرۋلارىنىڭ دارىگەرى تاعايىندايدى. بۇل كوبىنە جۇيكە جۇيەسىنىڭ قىزمەتىنە بايلانىستى تۋىندايتىندىقتان، اۋىر جاعدايلاردا ناۋقاستى تىنىشتاندىراتىن جانە ۇيىقتاتقىش دارىلەر، جۇيكە جۇيەسىنىڭ قوزعىشتىعىن باساتىن دارىلەر بەرىلەدى. شۇيگىنشوپ (ۆالەريانا) تامىرىن ۇنتاقتاپ، ونىڭ ەكى اس قاسىعىن ءبىر قۇتى سالقىن سۋعا سالىپ، 5 مينۋتتاي قايناتىپ، ءسۇزىپ الادى. الىنعان تۇندىرمانى ءبىر اي بويى كۇنىنە 2 رەت 1 اس قاسىقتان ىشەدى. بارىنەن بۇرىن تازا اۋادا سەرۋەندەۋ، دەنە جاتتىعۋلارىمەن اينالىسۋ ناۋقاستىڭ كۇش-قۋاتىن نىعايتادى. تىنىشتاندىرعىش دارىلىك وسىمدىكتەردەن تۇندىرما دايىنداپ ىشۋگە بولادى. ۇيقىعا مەزگىلىندە جاتىپ، تۇرۋ كەرەك. كوڭىل-كۇيدى جاقسى ۇستاۋ قاجەت. ۆ توبى دارۋمەندەرىن، ا دارۋمەنىن جانە بيوتين قابىلداۋعا بولادى. دارۋمەندەر جيىنتىعىن پايدالانۋدىڭ جاردەمى مول.

تەرىنىڭ سىرتىنا مىرىشتى، نافتالاندى، مەتاسيلدى جانە باسقاداي جاقپامايلاردى قولدانۋ كەرەك. قابىنۋ جاعدايلارى بولعان كەزدە از عانا ۋاقىت كورتيكوستەرويدتاردى تاعايىنداۋعا بولادى. ولاردى قابىنۋعا قارسى باسقا دارىلىك زاتتارمەن كەزەكتەستىرىپ بەرۋ كەرەك.

كۇن سايىن يتوشاعان ءشوبىن نەمەسە تەڭىز تۇزىن سالىپ، باسقا دا دارىلىك شوپتەر سالىنعان شومىلعى قابىلداۋدىڭ دا پايداسى زور. شومىلعىعا جارتى ليتر ءسۇت جانە بىر-ەكى قاسىق ءزايتۇن مايىن قوسىپ تا، سونداي-اق دەمدەلگەن شايمەن دە (25-50 گ شاي قوسىپ) قابىلداۋعا دا بولادى. سۋى تىم ىستىق بولماۋى كەرەك. 10-15 مينۋتتاي جاتقان دۇرىس.

سۋدان شىققاننان كەيىن دەنەنى سۇرتپەۋ كەرەك. ال سەبىلدى ءتىپتى پايدالانباعان ءجون. تاماقتانۋ جاعىنا دا كوڭىل ءبولۋ كەرەك. مايلى ەت، مايلى شۇجىق، جۇمىرتقا سارىسىن، سارىماي قولدانۋدى شەكتەگەن ءجون. ولاردا حولەستەرين كوپ. كۇندەلىكتى تاعامنىڭ كوبىسى كوكونىس، جەمىس-جيدەك، وسىمدىك مايى بولۋى كەرەك. كۇندەلىكتى دامدە ءسۇت ونىمدەرى، ەتسىز سورپالار بولعانى دۇرىس. ەتتى اپتاسىنا 1 نە 2 رەتتەن قولدانسا جەتىپ جاتىر. كۇكىرتتى سۋتەگىلى شومىلعىسى بار شيپاجايلارعا بارعان دۇرىس. قۇرامىندا كۇكىرتى بار بالشىقپەن دە ەمدەلۋگە بولادى.

گ. ارىنوۆا، تەرى دارىگەرى

---