InfoHub Logo

اقىر سوڭىندا مەفراۋ ۆان دامنىڭ شىدامى شارىقتاۋ شەگىنە جەتىپ، ماراپاتقا يە بولدى.

ونىڭ كۇيەۋى وتكەن اپتانىڭ جۇماسى كۇنى شىبىن جانىن تاڭىرگە تابىس ەتىپ تىندى.

ولاردىڭ وتاسىپ، ءبىر شاڭىراق استىندا تىرلىك كەشكەندەرىنە وتىز ەكى جىل. ەرجەتكەن ءۇش بالاسى بار. كۇمىس تويلارىنىڭ قارساڭىندا، مەرەكەنى اتاپ ءوتۋ ءۇشىن جالداپ قويعان زالدىڭ تورىندە وتىرعان مەفراۋ ۆان دامعا جاپ-جاس بەيتانىس جىگىت كەلىپ:

— ءسىزدىڭ كۇيەۋىڭىز ءتورت جىلدان بەرى قايداعى ءبىر جەزوكشەمەن بايلانىسىپ ءجۇر، مەن الگى قانشىقتى سول ءۇشىن تاستاپ كەتكەنمىن. ءسىز بۇل تۋرالى بىلەتىن بە ەدىڭىز؟ — دەدى.

ول بىلمەيتىن ەدى.

ءبىراق، كۇيەۋىنىڭ ءار جۇماسىن سايىن چەمودانىن تولتىرىپ الىپ، قالانىڭ شەتىندەگى ۋيكەندكە نە ءۇشىن قاتىناپ جۇرگەنىن تۇسىنگەندەي بولدى.

الدىن-الا جوسپارلانىپ قويىلعان كۇمىس تويىنا وسى ءبىر كەلەڭسىزدىكتىڭ كەسىرى تيگەن جوق. كەرىسىنشە ەرلى-زايىپتى ۆان دامدار اشەكەيلەنگەن ورىندىقتارعا جايعاسىپ، زال تولى تويعا جينالعان قوناقتاردىڭ ارقاسىندا تاماشا وتكەرىپ تاستادى. ولاردىڭ قۇرمەتىنە بىرنەشە مارتە ساۋلىق تىلەيتىن سازدى اۋەندەر شىرقالىپ جاتتى.

ەرتەڭىندە مەفراۋ ۆان دام كۇيەۋىنە بارلىعىن بىلەتىنىن، اجىراسۋدان باس تارتاتىنىن مالىمدەدى. ونىڭ ءدال وسىنداي شەشىم قابىلداۋى، كۇيەۋىنە دەگەن اسقان ىڭكار ماحابباتتىڭ دا، وزەگىن ورتەگەن قىزعانىشتىڭ دا، جۇرەگىنە شەمەن بولىپ شوگىپ قالعان كەكتىڭ دە كەسىرى ەمەس ەدى. ول تەك قانا زەينەتاقىسى مەن ساقتاندىرۋىنان ايىرىلىپ قالماۋ ءۇشىن وسىلاي ىستەۋگە ءماجبۇر بولدى.

دەسە دە، كۇيەۋىنىڭ تابىسى كوپ ەمەس-تى، شارۋاشىلىق شىعىندارىنا سوقىر تيىندارىن ساناپ بەرەتىن. ودان قالعانىن الگى ءبىر بيكەشتىڭ قالتاسىنا سالادى. ءبىر كۇنى مەفراۋ ۆان دامعا جاڭا كويلەك كەرەك بولعانىندا، بەتى قىزارىپ بالالارىنان اقشا سۇراۋعا تۋرا كەلدى. كۇيەۋىنىڭ اجال ساعاتىنىڭ تەزدەتىپ سوعۋى، سايىپ كەلگەندە مۇنى اۋقاتتى ايەل ساناتىنا قوسادى. سول سەبەپتى دە ول كۇيەۋىنىڭ ءولىمىن تاعاتسىزدانا تىلەدى.

كوپ جىلدار كۇتۋگە تۋرا كەلدى.

ولار بولەك بولمەلەردە تىرلىك كەشۋگە دە ۇيرەنىسىپ، ءوز ارالارىندا بىر-بىرىنە جاق اشپايتىن. مەفراۋ ۆان دام كۇيەۋىن تاماقتاندىرىپ، كيىپ جۇرگەن اناۋ-مىناۋ كيىمدەرىن رەتكە كەلتىرىپ قوياتىن. ءار جۇما سايىن ونىڭ چەمودانىن تولتىرىپ قويۋدى دا ادەتكە اينالدىرىپ العان-دى. كۇيەۋى قوشتاسپاستان الگى بيكەشكە كەتىپ قالاتىن. كۇيەۋى دە ايەلىنىڭ شىن مانىندە نە قالايتىنىن بىلمەي باسى قاتاتىن.

وتكەن اپتانىڭ جۇماسى كۇنى مەفراۋ ۆان دامنىڭ ءتوزىمى اقىر اياعىندا ماراپاتقا يە بولدى. تاڭەرتەڭ ول كۇيەۋى تۇنەيتىن بولمەنىڭ تەرەزەسىندەگى پەردەنىڭ تۇرىلمەي قالعانىنا كوزى ءتۇستى.

اسىپ-تاسقان ءۇمىت سەزىمىنە بولەنىپ، جاتىن بولمەنىڭ تابالدىرىعىنا تابانىن تيگىزدى.

ءبىراق كۇيەۋىنىڭ كىرپىگى ءالى دە بولسا قيمىلداپ جاتتى.

توسەك-ورىنىندا جاتىپ، وعان دارىگەر شاقىرۋ كەرەكتىگىن تاپسىردى.

«ءبارى دە سول ايتقانداي بولسىنشى» — دەپ، مەفراۋ ۆان دام كۇيەۋىنىڭ ول ءوتىنىشىن دە جەردە قالدىرماي قۇلىقسىز ورىنداي سالدى.

دارىگەر كەلىپ، ونى تۇگەل تەكسەرىپ، ناۋقاسقا شيپا بولاتىن دارىلەردىڭ ءتىزىمىن تولتىرىدى دا، دالىزگە شىعا بەرە وعان:

— ءسىزدىڭ كۇيەۋىڭىز وتە قاتەرلى اۋرۋعا شالدىققان. ءحالى وتە مۇشكىل. جۇرەگى اۋىرادى. ءسىز مەنىڭ كومەگىمە وتە كەش جۇگىنىپ وتىرسىز. ءسىرا، ول ءوزىن بىرنەشە اي بويى قولايسىز سەزىنىپ جۇرسە كەرەك. ءسىزدىڭ كۇيەۋىڭىز جۇرەگىنە سالماق سالعان.

— بولارى بولدى، بوياۋى ءسىڭدى — دەدى مەفراۋ ۆان دام.

دارىگەر بۇل كىسىنىڭ وسىلاي بولعانىنا قۋانىپ تۇرعانىن دا اڭعارىپ قالدى. دەگەنمەن دە ول جاسى تالايدى كورگەن وتباسى دارىگەرى بولعاندىقتان، كوپتەن بەرى اناۋ-مىناۋ نارسەلەرگە تاڭ قالمايتىن بولىپ العان ەدى، سول سەبەپتى دە ەشتەڭەگە تاڭدانىسىن بىلدىرمەدى.

سونان سوڭ مەفراۋ ۆان دام ءدارى ۇنتاعىنا بولا ءدارىحاناعا دا بارىپ كەلدى. ءبىراق ول دا كومەكتەسە العان جوق. كۇيەۋى سول كۇنى كەشكىلىك كوز جۇمدى. ءومىرىنىڭ سوڭعى جۇماسى كۇنى ول ونىمەن بىرگە قالدى. ول جان ءتاسىلىم ەتەتىن ساتتە مەفراۋ ۆان دام قاسىندا وتىردى. انە-مىنە كەلىپ الديلەيتىن اجالى جاقىنداپ قالسا دا، ول مۇنىمەن سويلەسكەن جوق. «كەشىرشى» دەگەن سوڭعى ءسوزىن دە قيمادى بۇعان. ءبىر ءتۇيىر بولسا دا السىزدىك كورسەتپەدى. بۇعان بەتىن بۇرىپ قاراعان دا جوق. بۇل ونىڭ توسەگىندە وتىرسا دا، تەك جالعىز ءوزى عانا ناعىز ەرلەرشە دەمى تاۋسىلىپ، تۋعالى بەرى ەلۋ سەگىز جىل عۇمىر كەشكەن جارىق دۇنيەگە سولاي قوش ايتتى.

— قالاي بولعاندا دا مەنىكى دۇرىس بولىپتى — دەيدى مەفراۋ ۆان دام بۇگىندە — ول و، دۇنيەگە جاپ-جاس قالپىندا اتتاندى. ال مەن بولسام الپىسقا اياق ارتقانىمدا مول اقشانى قولىما ءتۇسىردىم، راحاتتانىپ ءومىر سۇرۋگە ۋاقىت جەتىپ جاتىر. ال ءانابىر سالداقى ساۋساعىن سورىپ سورلاپ قالدى.

---