InfoHub Logo

АҚШ Орталық Азиядағы Түрікменстанды қоса алғанда бірнеше ел азаматтарына B1/B2 санатындағы туристік және іскерлік визалар үшін $5 000–$15 000 мөлшерінде визалық кепілақы енгізді. Қадамның мақсаты – визамен кірген шетелдіктердің елде белгіленген мерзімнен асыра қалуын азайту. Талап 2026 жылғы 1 қаңтардан күшіне енді.

Бұл туралы Infohub.kz ақпарат агенттігі хабарлайды.

Кімдерге қатысты және қанша төленеді

Мемлекеттік департамент 2026 жылдың басынан бастап тізімді кеңейтті: оған Түрікменстан, Бутан, Ботсвана, Орталық Африка Республикасы, Гвинея, Гвинея-Бисау және Намибия қосылды. Жалпы, бағдарлама 13 елге тарайды.

Кепілақы сомасы өтініш берушіге қарай $5 000-нан $15 000-ға дейін өзгеруі мүмкін. Бұл қаражат визаны автоматты түрде кепілдемейді, алайда виза берілмеген жағдайда өтініш иесіне қайтарылады.

Кіру ережесі: тек үш әуежай

Визасы мақұлданған азаматтар АҚШ-қа тек үш халықаралық әуежай арқылы өте алады: Бостондағы Логан, Нью-Йорктегі Джон Ф. Кеннеди және Вашингтон маңындағы Даллес авиа тораптары.

Бағдарлама қалай басталды

Мемлекеттік департаменттің пилоттық бастамасы 2025 жылғы тамызда іске қосылған. Ол визалық режимді бұзу, яғни елде рұқсат етілген мерзімнен асырып қалу деңгейі жоғары елдердің азаматтарына арналған және B1/B2 санаттарына ғана қолданылады.

Контекст

Бұған дейін АҚШ Diversity Visa (DV) лотереясы аясындағы барлық визаларды уақытша тоқтатқан болатын. Жаңа кепілақы талабы соның жалғасы ретінде визалық тәртіпті күшейтуге бағытталған.