InfoHub Logo

2023 жылдың 24 ақпанында Таиландта жол апатынан қаза тапқан қазақстандық музыкант Дархан Жүнісбековтің (Darkhan Juzz) есімі әлі күнге жанкүйерлерінің жүрегінде сақтаулы. Жақында желіде әншінің тірі кезінде берген, бұрын көпшілікке белгісіз болған сұхбаты қайта тарап, оқырмандарды ерекше толқытты.

Бұл туралы Infohub.kz ақпарат агенттігі хабарлайды.

Болашаққа қатысты ерекше ойлар

Сұхбат барысында Дархан Жүнісбеков өзінің болашағы туралы айтқан елестерін бөліскен. Ол бір кездері өмірінің тым ұзаққа созылмайтындай сезімде болғанын, тіпті 36-37 жасқа дейін ғана өмір сүретіндей елестеткенін жеткізген.

"Мен өзімді 36-37 жасқа дейін ғана өмір сүретіндей елестететінмін. Бір қайғылы жағдайдан көз жұматын сияқтымын. Әуелі танымал боламын, сахнада жарқыраймын, содан кейін ғайып боламын деп ойлайтынмын. Бірақ уақыт өте келе бұл ойымнан бас тарттым. Бақытты өмір сүргім келді. Қартайып, немерелерімді көргім келді, жарқын болашаққа сенгім келді", – деген еді марқұм музыкант.

Жанкүйерлердің пікірлері

Видео қайта жарияланғаннан кейін әлеуметтік желі қолданушылары түрлі пікір білдірді. Көпшілігі бұл сөздерді әншінің ішкі сезімімен немесе тағдырдың жазуымен байланыстырды.

"Бәрін жүрегімен сезген екен", "Ерте кетті", "Тірі болғанда талай биікті бағындырар еді", "Жақсы сөз айтып жүру керек деген осы", – деп жазды жанкүйерлері.

Еске алу

Darkhan Juzz 33 жасында Таиландта болған жол апатынан қайтыс болды. Кейін Алматыда жүздеген адам Арбатқа жиналып, марқұмды еске алды. Жанкүйерлері гүл мен шам ұстап, оның әндерін орындап, өнер иесінің рухына тағзым еткен болатын.

Дархан Жүнісбековтің ең танымал әндерінің бірі – "Erikpe". Қазір бұл туындыны әнші YENLIK орындап жүр.