InfoHub Logo

Абай облысында бұрын сотталып, жазасын өтеп шыққан азаматқа қатысты сот үкімі қайта қаралып, жаза мерзімі он жылға дейін ұлғайтылды. Бұл жағдай қоғамда қызу талқыланып, әділдік мәселесін туындатты.

Бұл туралы Infohub.kz ақпарат агенттігі хабарлайды.

Оқиғаның мән-жайы

Оқиға 2023 жылы Абай облысындағы Бақты кеден бекетінде болған. 33 жастағы Нұржан Амантаев пен Ақжол Қуанышбаев офицер Дастан Қазтұрғанмен жанжалдасып қалған. Тергеу деректері бойынша, жанжал кезінде офицердің бет тұсынан соққы болған.

Алғашқы сот отырысында Нұржан Амантаев Қазақстан Республикасы Қылмыстық кодексінің 380-бабының 4-бөлігі бойынша кінәлі деп танылып, үш жылға бас бостандығынан айырылған. Алайда, тәртібі жақсы болғандықтан, ол екі жыл екі айдан кейін мерзімінен бұрын босатылған.

Сот үкімінің өзгеруі

Кейінірек іс қайта қаралып, бұрынғы сот үкімінің күші жойылды. Абай облыстық соты істі қайта саралап, Нұржан Амантаевқа тағы 10 жылға бас бостандығынан айыру жазасын кесті. Осы шешімнен кейін азамат қайтадан қамауға алынды.

Әкесінің ашық хаты

Бұл жағдайға байланысты Нұржан Амантаевтың әкесі Қазақстан Президентіне ашық хат жолдап, істің әділ қаралуын сұрады. Әкесінің айтуынша, ұлы жасаған әрекетін жоққа шығармайды, бірақ ол бұрынғы жазасын өтеп шыққан. Мерзімінен бұрын босатылған азаматты қайта қамап, жазаны еселеп ауырлату түсініксіз екенін айтты.

Жәбірленуші тараптың ықпалы туралы күдік

Сотталған азаматтың туыстары істің қайта қаралуына жәбірленуші тараптың ықпалы болуы мүмкін деген күдік білдіреді. Олардың айтуынша, жәбірленуші офицердің туыстары мемлекеттік қызметте жоғары лауазымдарда жұмыс істейді. Атап айтқанда, жәбірленушінің ағасы прокуратурада, ал әкесі экономика министрлігінде қызмет етеді. Бұған қоса, олардың туыстары арасында бұрын сот төрағасы болған адам да бар көрінеді. Бұл жағдайлар істің әділ қаралуына күмән тудырады деп санайды.

Туыстарының сөзінше, алғашқыда 2 миллион теңге төленгенімен, кейіннен 40 миллион, одан кейін тағы 17 миллион теңге сұралған. Бұл соманы төлей алмаған соң жазаның күрт ауырлағанын айтады.

Адвокаттың пікірі

Алайда, жәбірленуші тарап бұл пікірмен келіспейді. Офицер Дастан Қазтұрғанның адвокаты сотталғандарға берілген жаза тым жеңіл деп санайды. Адвокаттың айтуынша, шабуыл ұйымдасқан түрде жасалған және жәбірленуші ауыр жарақат алған. Оның жақ сүйегі мен мұрын сүйегі сынған, бас-ми жарақаты анықталған. Бұл жарақаттардың денсаулығына ұзақ мерзімді әсер етуі мүмкін екенін айтып, соттан жазаны кемінде 13 жылға дейін ұлғайтуды және 13 миллион теңге моральдық-материалдық шығын өндіріп беруді сұраған.

Қорғаушы тарап сот-медициналық сараптама жәбірленушінің жарақаттары өміріне қауіпті болмағанын көрсеткенін алға тартады. Олар апелляциялық соттың бұл қорытындыларды ескермегенін айтып, істі бұрынғыдай Қылмыстық кодекстің 380-бабының 4-бөлігі бойынша қарап, үш жыл жаза тағайындауды сұрап отыр.

Келесі кезең

Бұл іс бойынша соңғы шешімді кассациялық сот қабылдайды. Сот отырысы 2026 жылғы 22 сәуірде Астана қаласында өтеді деп жоспарланған.