InfoHub Logo

Астанада Салтанат Нүкенованың ағасы Айтбек Амангелді мен Қуандық Бишімбаевтың әпкесі Аружан Бишімбаева арасындағы дау сотқа жетіп, талап арыз ішінара қанағаттандырылды.

Бұл туралы Infohub.kz ақпарат агенттігі хабарлайды.

Кітап пен әлеуметтік желідегі дау

Естеріңізге сала кетейік, 2024 жылдың мамырында бұрынғы ұлттық экономика министрі Қуандық Бишімбаев азаматтық жұбайы Салтанат Нүкенованы өлтіргені үшін 24 жылға бас бостандығынан айырылған болатын. Алайда, бұл трагедиядан кейін екі тараптың туыстары арасындағы пікірталас толастамады.

Өткен жылдың күзінде Айтбек Амангелді "Ее звали Салтанат" атты естелік кітабын жарыққа шығарды. Кейін Аружан Бишімбаева әлеуметтік желіде бұл кітапқа қатысты сын айтып, авторды трагедияны жеке пайда үшін қолданды деп айыптады.

Аружан Бишімбаеваның мәлімдемелері

Ол Instagram парақшасында Айтбек Амангелдіге қатысты бірнеше ауыр мәлімдеме жасап, оны хайп қуып жүргенін, әлеуметтік желілерде боттарды қолданатынын және халықтың жанашырлығын қаржылық мақсатта пайдаланып отырғанын жазды.

Бұған жауап ретінде Айтбек Амангелді аталған жазбаларды нотариус арқылы рәсімдеп, сотқа жүгінді. Ол жарияланған ақпараттың жалған екенін және өзінің ар-намысына нұқсан келтіргенін айтты.

Сот шешімі

Іс аясында екі сараптама жүргізіліп, онда Бишімбаева жариялаған кейбір пікірлердің талапкердің беделіне кері әсер етуі мүмкін екені анықталды. Ал жауапкер тарапы бұл жазбалардың субъективті пікір екенін алға тартты.

Қосымша сараптама нәтижесінде Аружан Бишімбаеваның кейбір мәлімдемелерінде нақты негативті мазмұн бар екені белгілі болды. Сот Instagram желісінде жарияланған бірнеше мәлімдемені шындыққа сәйкес келмейді деп танып, оларды теріске шығаруды міндеттеді.

Сонымен қатар, Аружан Бишімбаевадан сараптамалар мен өкілдік шығындары үшін 1 миллион теңгеден астам қаражат және моральдық зиян ретінде 100 теңге өндірілетін болды. Алайда, сот шешімі әзірге заңды күшіне енген жоқ.