InfoHub Logo

Alatau City Bank банкінің иесі, миллиардер Вячеслав Кимге тиесілі First Heartland Securities (FHS) компаниясы атауын United Group Alatau деп өзгертуді жөн көрді. Бұл туралы компанияның корпоративтік деректерінен белгілі болды.

Бұған дейін First Heartland Securities 2019 жылдың басында дағдарысқа ұшыраған Цеснабанк-ті сатып алып, оны Jusan Bank деп атаған болатын. Кейіннен, 2021 жылдың қыркүйегінде Галимжан Есеновке тиесілі АТФБанк те Jusan Bank-тің бақылауына өтті.

2020 жылға дейін FHS компаниясы Pioneer Capital Invest арқылы Қазақстан үкіметі аппараты мен бұрынғы президент Нұрсұлтан Назарбаевтың «Назарбаев қоры» бақылайтын қорларға тиесілі болды. Алайда, 2020 жылы Pioneer Capital Invest акцияларының 99,7% британдық Jusan Technologies компаниясына берілді.

Бұл мәміле және Jusan Bank-тің шетелдік бақылауға өтуі бірқатар даулы сот істеріне себеп болды. 2023 жылдың маусымында барлық даулар аяқталып, Jusan Bank және оның еншілес ұйымдары қазақстандық юрисдикцияға қайтарылды. Алайда, олар Назарбаев қорына емес, бизнесмен Галимжан Есеновке берілді. Осы сәттен бастап ол First Heartland Securities арқылы банк акцияларының 77,86%-на иелік етті, ал қалған 19,67% тікелей оған тиесілі болды.

Вячеслав Кимнің Jusan Bank-ті сатып алу ниеті туралы алғаш рет 2024 жылдың қыркүйегінде Bloomberg агенттігі хабарлаған еді. Ал 2025 жылдың шілдесінде Ким бұрынғы Jusan Bank-ті сатып алуды аяқтап, FHS-ке бақылау орнатты.

Kaspi.kz-тің тең құрылтайшысы Вячеслав Ким Forbes рейтингісі бойынша ең бай қазақстандық болып саналады. Оның байлығы 7,1 млрд долларға бағаланады. 2025 жылдың мамыр айының соңында ол Alatau-ға жеке қаражатынан 1 млрд доллар салуды жоспарлап отырғанын мәлімдеген.