InfoHub Logo

Атырауда интернеттен «оңай ақша» тапқысы келген азаматтарға елеулі ескерту жасаған маңызды сот үкімі шықты. Бұл – өңірде алғаш рет азаматтың банк шотын үшінші тұлғаларға ақшалай сыйақы үшін бергені үшін қылмыстық жауапкершілікке тартылуы.

Бұл туралы Infohub.kz ақпарат агенттігі хабарлайды.

Банк шотын «жалға беру» – қылмыс

Сот анықтағандай, өткен жылдың соңында Атырау қаласының тұрғыны А.М. мессенджерлер арқылы жылдам ақша табу туралы ұсынысқа келісіп, өз банктік шотына толық қолжетімділікті бейтаныс адамдарға берген. Кейіннен, бұл шотты қылмыстық жолмен алынған ақшалай қаражатты аудару үшін пайдаланған.

Бұл әрекеттер салдарынан жәбірленуші тарап материалдық шығынға ұшыраған.

Жаңа заңнама және оның маңызы

Атырау қаласының №2 соты А.М.-ді кінәлі деп танып, айыптау үкімін шығарды. Облыс прокуратурасының мәліметінше, 2025 жылдың 16 қыркүйегінен бастап Қазақстан Республикасы Қылмыстық кодексінің 232-1-бабы күшіне енген. Бұл бап банк шоттарын, төлем карталарын немесе оларға қол жеткізуді сыйақы үшін үшінші тұлғаларға берумен айналысатын заңсыз қаржылық делдалдықпен күресуге бағытталған.

Азаматтың қылмыстық схеманың ауқымын түсінген-түсінбегеніне немесе қанша табыс тапқанына қарамастан, банк картасын немесе оған қол жеткізуді үшінші тұлғаға беру фактісінің өзі қылмыстық жауапкершілікке әкеп соғады.

Прокуратура мұндай әрекеттердің кез келген түрі, яғни банк картасын «жалға беру» азаматты қылмысқа ортақ ететінін және соттылыққа әкеп соғатынын атап өтті. Атырауда мұндай фактілерді анықтау және жолын кесу бойынша жұмыстар күшейтілген режимде жүргізіліп, жалғаса береді.