InfoHub Logo

Атырау қаласындағы "Авангард" ықшам ауданының тұрғындары автобустардың соңғы аялдамасын тұрғын үйлердің маңынан әкетуді талап етіп, наразылық білдірді. Бұған дейін бұл мәселе бойынша бірнеше рет шағым түскенмен, тиісті шешім қабылданбаған соң, халық өз бетінше жағдайды бақылауға алды.

Бұл туралы Infohub.kz ақпарат агенттігі хабарлайды.

Тұрғындардың айтуынша, күн сайын таңертең ерте оянып, автобус қозғалтқыштарының гуілі мен күрт үдеретін көліктердің дауысынан тыныш ұйықтай алмайды. Күндіз де тыныштық болмай, автобустардың кіріп-шығуы, дыбыс сигналдарын беруі, жұмыс істеп тұрған қозғалтқыштардың иісінен үй ішіндегі ауа ластанып, терезе алдына шаң жиналады.

Автобус қозғалысының қарқындылығы

Тұрғындар жүргізген бақылау бойынша, күндізгі бір сағат ішінде (13:00-14:00) 43 рет автобус кіріп, 47 рет шыққан, яғни барлығы 90 мәневр жасалған. Келесі күні бұл көрсеткіш 53 кіріс және 49 шығыспен 102 мәневрге жеткен. Автобустардың арасындағы интервал шамамен бір минутты құраған. Екі сағат ішінде аялдамадан 96 автобус өткен.

Таңғы сағат 05:50-де алғашқы көліктер келіп, 06:30-ға қарай олардың саны оннан асады. Ал ресми кесте бойынша, қозғалыс 06:40-та басталуы тиіс.

Маршруттар мен шу деңгейі

Аялдама арқылы 12 бағыт өтеді: №10, 11, 12, 14, 15, 50, 52, 61, 63, 64, 65 және 67. Автобустар сұйытылған газбен жұмыс істейді. Тұрғындардың айтуынша, автобустар тұрақ кезінде қозғалтқыштарын 10-15 минутқа дейін өшірмей қояды.

Олардың сөзінше, автобустың үдетуі кезінде шу деңгейі 85-95 децибелге жетеді, ал екі бес қабатты үйдің арасындағы тар кеңістікте дыбыс күшейеді. Тұрғын аймақтарда күндізгі рұқсат етілген деңгей – 55 децибел, ал түнде 45 децибел болуы керек.

Нормативтік талаптар мен нақты жағдай

Санитарлық органдардың жауаптарында аялдамалар мен тұрақтардың тұрғын аймақтан кемінде 50 метр қашықтықта орналасуы керектігі айтылған. Алайда, бағыттардың саны мен қозғалыс қарқындылығына қатысты нақты нормалар жоқ.

Тұрғындар бұл қашықтық нормасының формальды түрде сақталуына байланысты аялдаманың бұрынғы орнында қалуына себеп болды деп санайды. Бірақ олардың айтуынша, нақты қозғалыс көлемі ескерілмеген.

Сонымен қатар, "Avtobys" қосымшасында №10 бағытының аялдамаға кірмейтіні көрсетілгенімен, автобустар әлі де сол жерге тоқтап, жолаушыларды түсіріп, тұрақтап жатқаны айтылады.

Келесі қадамдар

Қазіргі таңда ұжымдық шағым Санитарлық-эпидемиологиялық бақылау комитетінде қаралуда. Шу мен атмосфералық ауаны өлшеу жұмыстары тағайындалды.

Алайда, тұрғындар жұмыс режимін өзгертуді емес, аялдаманы мүлдем басқа жерге көшіруді талап етеді. Олардың пікірінше, тұрғын үйлердің терезесінің астында минут сайын көліктер қозғалатын көлік торабы жұмыс істемеуі тиіс.

"Біз автобустарға қарсы емеспіз. Біз аялдаманың осында орналасқанына қарсымыз", - дейді олар.

Редакция қала әкімдігі мен тиісті қызметтерге қосымша сауал жолдап, нақты жүктемені ескере отырып, аялдаманың орналасуын қайта қарау жоспарланып отырғаны туралы түсініктеме беруді сұрады.