InfoHub Logo

Атырау қаласындағы мектептердің бірінде 8-сынып оқушысы пышақ жарақатын алды. Оқиға орнына жедел жәрдем мен полиция қызметкерлері келді.

Бұл туралы Infohub.kz ақпарат агенттігі хабарлайды.

Оқиғаның мән-жайы

Алдын ала мәліметтер бойынша, пышақтап алған 9-сынып оқушысы. Күдікті ұсталып, ата-анасымен бірге полиция бөліміне жеткізілді. Барлық процессуалдық әрекеттер оның заңды өкілдерінің қатысуымен жүргізілуде.

Қазіргі уақытта полиция қызметкерлері қажетті тергеу әрекеттерін жүргізіп жатыр. Оқиғаның мән-жайы анықталуда.

Қылмыстық іс қозғалды

Бұл дерек бойынша қылмыстық іс қозғалды.

«Жасөспірімнің ата-анасы да бала тәрбиесіндегі міндеттерін тиісінше орындамағаны үшін жауапқа тартылатын болады», - деп қосты ведомство.

Өзге ақпарат тергеу мүддесінде жарияланбайды.

Денсаулық жағдайы

Атырау облыстық денсаулық сақтау басқармасы хабарлағандай, зардап шеккен қызға уақтылы медициналық көмек көрсетілді.

Алғашқы тексерістен және шұғыл көмек көрсетілгеннен кейін оны одан әрі бақылау және емдеу үшін облыстық балалар ауруханасына жеткізді.

«Пациенттің жағдайы орташа ауырлықта, тұрақты деп бағаланады. Ол дәрігерлердің тұрақты бақылауында және қажетті көлемде медициналық көмек алуда. Емдеу толық көлемде жүргізілуде», - деп атап өтті облыстық денсаулық сақтау басқармасы.