InfoHub Logo

Астанада белгілі блогер Ерболат Жанабыловқа қатысты сот үкімі жарияланды. Сот отырысында судья Әділбек Баймаханов блогерді кінәлі деп танып, оған шартты түрде 2 жыл бас бостандығынан айыру жазасын кесті. Сонымен қатар, оның мүлкі тәркіленді.

Бұл туралы Infohub.kz ақпарат агенттігі хабарлайды.

Жанабыловтардың ісі: Не болды?

Ерболат Жанабылов пен оның әйелі Эльмира Төлегеноваға «Заңсыз кәсіпкерлік» және «Қылмыстық жолмен алынған ақшаны немесе өзге де мүлікті заңдастыру» баптары бойынша айып тағылған еді. Бастапқыда прокурор екеуіне де 4 жылдан бас бостандығынан айыруды сұраған болатын. Алайда, кейіннен айыптаушы тарап келісімге келіп, жеңілдетілген жаза тағайындауды ұсынды.

Әйеліне де жаза кесілді

Эльмира Төлегеноваға да 2 жыл бас бостандығынан айыру жазасы кесілді. Алайда, оның кіші жастағы балалары бар екені ескеріліп, жазаны өтеу мерзімі 2 жылға кейінге шегерілді. Бұл оның жазасы нақты болып қалатынын, бірақ дереу колонияға жіберілмейтінін білдіреді.

Сот процесі қалай өтті?

Іс бойынша сот отырысы 16 наурызда Астанада басталды. Жанабыловтар жұбайы журналистердің сот залында суретке түсіруіне және бейнежазба жасауына қарсылық білдірген. Блогерлердің адвокаты істі прокурорға қайтару туралы өтінішхат бергенімен, сот оны қанағаттандырмады. Тергеу мәліметтері бойынша, блогерлердің жобаларына жалпы сомасы 247 миллион теңгеден астам қаражат түскен.