InfoHub Logo

Мәжіліс депутаты Бақытжан Базарбек «Болашақ» бағдарламасы бойынша шетелде білім алып жатқандардың тізімін жариялауды талап етті. Оның айтуынша, кейбір азаматтар бюджет қаражатын заңсыз пайдаланып, тегін білім алуда.

Бұл туралы Infohub.kz ақпарат агенттігі хабарлайды.

«Болашақ» бағдарламасындағы бұзушылықтар

Депутаттың сөзінше, 15 үміткер бойынша республикалық комиссияның шешімі болмаса да, олар шетелде білім алуда. Бұған қоса, 151 стипендия жоспардан тыс, лимиттен асырылып, 2 миллиард 519 миллион теңгеге тағайындалған.

«15 үміткер бойынша республикалық комиссияның ешқандай шешімі жоқ, бірақ олар оқып жатыр. 151 стипендия жоспардан тыс, лимиттен асырылып, 2 миллиард 519 миллион теңгеге тағайындалды», - деді Базарбек.

Кепілдеме және залал

Депутат 71 үміткердің бір-біріне кепілдеме беріп, «тығылып» әрекет еткенін айтты. Бұл эпизод бойынша келтірілген залал 876 миллион теңгеге бағаланған.

«Жалпы 10 миллиард теңгеге жуық сома шығып тұр. Шетелде «тегін» білім алып жатқан кімдердің балалары, кімдердің туыстары бар екенін министрлік нақты, ашық жариялауы керек», - деп мәлімдеді Базарбек.

Қаражатты қайтару және комиссия құру

Депутат есеп беру қорытындысы бойынша «Болашақ» бағдарламасы бойынша мамандар даярлауға жұмсалған қаражатты қайтару туралы талап арыз беруді ұсынды.

Сондай-ақ, ол Жоғарғы аудиторлық палатаның қорытындысында көрсетілген бұзушылықтарға қатысы бар лауазымды тұлғаларды анықтау үшін Бас прокуратура мен құқық қорғау органдарының қатысуымен комиссия құруды ұсынды.