InfoHub Logo

Египеттің ежелгі пирамидалары мен тарихи жәдігерлері әлі де көптеген құпияларды жасырып келеді. Жақында италиялық зерттеуші Филиппо Бионди Гизе платосының астынан екінші Сфинкс мүсіні табылуы мүмкін деген болжам айтты. Бұл жаңалық әлемдік археология қауымдастығында қызу талқылау тудыруда.

Бұл туралы Infohub.kz ақпарат агенттігі хабарлайды.

Биондидің айтуынша, спутниктік радиолокациялық сканерлеу жұмыстары құмның астында ірі, симметриялы құрылымның барын көрсеткен. Ол бұл жаңалықты Matt Beall Limitless подкастында жариялады.

Ескі жазбалар мен жаңа деректер

Зерттеушінің бұл болжамына негіз болған факторлардың бірі – Мысыр перғауыны Тутмос IV кезінде (шамамен біздің заманымызға дейінгі XIV ғасыр) жасалған «Түс стеласы». Бұл стелада екі сфинкске ұқсас бейнелер бар. Бионди мұны екінші мүсіннің бар екендігінің белгісі деп санайды.

Бұған дейін египтолог Бассам Эль-Шаммаа да осындай пікір білдірген болатын. Алайда, Мысырдың бұрынғы көне жәдігерлер министрі Захи Хавасс бұл аймақтың мұқият зерттелгенін және екінші мүсіннің бар екеніне ешқандай дәлел табылмағанын айтқан еді.

Ғалымдар не дейді?

Биондидің жаңа радиолокациялық деректері платодағы төбелердің бірінің астында тік шахталар мен жолдары бар ірі құрылымның бар екенін көрсетеді. Бұл құрылым белгілі Сфинкстің астындағы құрылымдарға ұқсас көрінеді.

Дегенмен, археологтар бұл қорытындыларды әзірге мойындамай отыр. Пирамидалар астында жасырынған «мегақұрылымдардың» бар екендігі қазба жұмыстарымен расталмаған және бұл әлі де дәлелденбеген гипотеза болып саналады.

Айта кетейік, Египетте Луксордағы сфинкстер аллеясы сияқты кішірек мүсіндер де бар. Зерттеушілер мерзім-мерзім құм астында жатқан «екінші» сфинкстер туралы гипотезалар ұсынып отырады, бірақ ресми түрде тек біреуі – атақты Үлкен Сфинкс бар екені расталған.