InfoHub Logo

Қытайдың танымал онлайн сауда алаңы Temu Еуропа Одағындағы цифрлық қызметтер туралы заңнаманы бұзғаны үшін 200 миллион еуро көлемінде айыппұлға тартылды. Бұл шешім тұтынушылардың қауіпсіздігі мен заңсыз тауарлардың таралуына қатысты алаңдаушылықтарға байланысты қабылданды.

Бұл туралы Infohub.kz ақпарат агенттігі хабарлайды.

Алаңдағы тәуекелдер мен қауіптер

Еуропалық комиссияның хабарлауынша, Temu компаниясы өз платформасындағы заңсыз тауарлардың таралуына байланысты жүйелі тәуекелдерді анықтап, бағалауда жеткіліксіздік танытқан. Комиссия жүргізген "жасырын сатып алу" операциясы кезінде, сатылымға шығарылған кейбір зарядтағыштар қауіпсіздік сынақтарынан өтпегені, ал балаларға арналған ойыншықтардың бірқатарында рұқсат етілген мөлшерден асатын химиялық заттар немесе тұншығу қаупін тудыратын ұсақ бөлшектер анықталған.

Дизайн мен жарнаманың әсері

Temu-дың ұсыныс жүйелері мен жарнамалық бағдарламалары да сынға алынды. Әсіресе, әлеуметтік желілердегі инфлюенсерлер арқылы жүргізілетін науқандар заңсыз өнімдердің таралу қаупін арттыруы мүмкін деген болжам бар.

Temu-дың жауабы

Temu компаниясы Еуропалық комиссияның шешімімен келіспейтінін және айыппұлды негізсіз деп санайтынын мәлімдеді. Компанияға бұл бұзушылықтарды жою үшін бір ай мерзім берілді. Екі айдан кейін комиссия қорытынды шешім қабылдайды.

Бұл – Еуропа Одағының цифрлық қызметтер туралы заңына сәйкес салынған екінші ірі айыппұл. Бұған дейін әлеуметтік желі X (бұрынғы Twitter) жарнаманың ашықтығын қамтамасыз етпегені үшін 120 миллион еуро айыппұл төлеген болатын.