InfoHub Logo

Жамбыл облысында табиғаттың тосын мінезі салдарынан төтенше жағдай режимі енгізілді. Қатты желден болған зардаптарды бағалау және зақымдалған нысандардың жай-күйін тексеру үшін облыс әкімінің бірінші орынбасары Нұржан Кәлендеров оқиға орнына барды.

Бұл туралы Infohub.kz ақпарат агенттігі хабарлайды.

Табиғи апаттың салдары

Ақпаратқа сүйенсек, 21 ақпанда Жамбыл облысының бірнеше елді мекенін қамтыған қатты жел салдарынан үйлер мен әлеуметтік нысандар зақымдалған. Т. Рысқұлов ауданында жел 29 нысанның шатырын жұлып әкеткен, оның 10-ы әлеуметтік мекемелер. 19 елді мекенде электр қуаты уақытша тоқтатылып, жеті елді мекенде газбен жабдықтау да қиындық тудырған. Меркі ауданында да 27 тұрғын үйдің шатыры мен бес мектептің қасбеті зақымдалды. Сегіз елді мекен электрсіз қалса, үш елді мекенде газ желілері зардап шеккен. Қазіргі уақытта құрбандар мен зардап шеккендер туралы ақпарат жоқ.

Қалпына келтіру жұмыстары

Облыс әкімінің бірінші орынбасары Нұржан Кәлендеров жедел штабтың отырысын өткізіп, нақты тапсырмалар берді. Оның ішінде электр және газбен жабдықтауды басымдықпен қалпына келтіру, құлаған ағаштар мен зақымдалған құрылыстарды тазарту, мектептерде балалардың қауіпсіздігін қамтамасыз ету және жұмыстарды сапалы әрі уақытылы аяқтау міндеттелді. Т. Рысқұлов ауданында бірқатар нысандарда жергілікті төтенше жағдай жарияланды. Келтірілген шығынның көлемін анықтау жұмыстары жалғасуда. Электр және газбен жабдықтауды қалпына келтіру үшін 10 бригада жұмылдырылып, жөндеу жұмыстары мәресіне жақындап қалды.

«Жағдай облыс әкімінің жеке бақылауында, ал тұрғындар коммуналдық қызметтердің толық қолдауына сене алады», - деп хабарлады Жамбыл облысы әкімінің баспасөз қызметі.