InfoHub Logo

Қуанышты жаңалық! Допинг дауына іліккен қазақстандық боксшы Жәнібек Әлімханұлына қатысты шешім шықты. Бүкіләлемдік бокс ұйымы (WBO) орта салмақтағы чемпионды бір жылға спорттан шеттеткенімен, оның чемпиондық белбеулері сақталып қалды.

Бұл туралы Infohub.kz ақпарат агенттігі хабарлайды.

Дисквалификация және оның салдары

Дисквалификация мерзімінде Жәнібек Әлімханұлы кәсіби және коммерциялық кездесулерге қатыса алмайды. Алайда, WBO рейтингтегі үміткерлердің құқығын қорғау мақсатында уақытша чемпиондық белбеу үшін жекпе-жек өткізуге рұқсат берді. Онда бірінші нөмірлі үміткер Дензел Бентли екінші нөмірлі Энди Сааведрамен кездеседі.

Боксшының міндеттері

Дисквалификация аяқталған соң, Жәнібек Әлімханұлы уақытша чемпионмен міндетті түрде жекпе-жек өткізуі тиіс. Бұл айқас толыққанды чемпионды анықтайды. WBO шешімі бойынша, бұған дейін ешқандай аралық кездесу өткізуге болмайды. Егер бұл талап орындалмаса, қосымша санкциялар қолданылуы мүмкін.

WBO шешімінің себебі

WBO президенті Густаво Оливьеридің айтуынша, бұл шешімді ұйымның чемпиондық жекпе-жектер комитеті бірауыздан қабылдаған. Жаза мерзімі 2025 жылғы 2 желтоқсаннан бастап күшіне енеді. Ұйым алдағы уақытта толық қорытындысы мен талаптары көрсетілген ресми құжатты жариялайды.

Допинг дауы қалай басталды?

Еске сала кетейік, 6 желтоқсанға жоспарланған үш титул үшін айқас алдында Жәнібек Әлімханұлы допинг дауына іліккен болатын. WBO қазақ боксшысының сынамасынан тыйым салынған зат табылғанын ресми растады. 19 қаңтарда іс бойынша екінші тыңдау өтті. Кейіннен допинг сынамасы оң нәтиже көрсеткені белгілі болды. Қазіргі уақытта боксшы тергеу аяқталғанға дейін барлық жекпе-жектерден шеттетілген.