InfoHub Logo

Солтүстік Қазақстан облысында шенділер су тасқынын сылтау етіп, әкімдіктің еш зақымданбаған ғимаратын жөндеуге бюджеттен 156 миллион теңге алмақ болған.

Бұл туралы Infohub.kz ақпарат агенттігі хабарлайды.

Деректерге сүйенсек, Солтүстік Қазақстан облысының Қызылжар ауданы әкімдігі ғимаратты жөндеуге 156 миллион теңге бөлген. Ресми мәліметтер бойынша, бұл қаражат төтенше жағдайдың салдарын жоюға бағытталған.

Ғимарат зақымдалмаған, бірақ жөндеуге ақша бөлінген

Алайда, мемлекеттік сатып алу порталындағы мәліметтерге қарағанда, аталған ғимаратта ешқандай төтенше жағдай орын алмаған. Су тасқыны кезінде ғимарат зақымдалмаған. Тіпті, бейнежазбадан көрінгендей, ғимарат шұғыл жөндеуді қажет ететіндей көрінбейді.

Күмәнді мердігер және қысқа мерзімдегі жұмыс

Шарт жеке кәсіпкермен жасалған. Қызығы сол, бұл кәсіпкер мемлекеттік сатып алу порталында шарт жасалған күні ғана тіркелген. Оның үстіне, құрылыс жұмыстарына қажетті сандық кодтар шартқа қол қойылғанға дейін бір апта бұрын ғана қосылған. Ең таңқаларлығы – жұмыс актісі бір апта ішінде рәсімделген. Бұл ғимаратты бір аптада жөндеуге үлгерген дегенді білдіреді.

Прокуратура араласты, бірақ ақша төленді

Бұл жағдайға прокуратура назар аударып, шартты бұзу туралы нұсқау берген. Нәтижесінде, шарт бір жақты тәртіппен тоқтатылған. Алайда, осы уақытқа дейін 156 миллион теңгенің 95 миллион теңгесі мердігерге төленіп үлгерген.