InfoHub Logo

Ендігі уақытта қазақстандықтарды газ есептегіштерін ауыстыруға байланысты шығындардан құтқару жоспары бар. Мәжілісмендер бұл міндетті газ таратушы компанияларға жүктеуді ұсынып отыр. Бұл шара халықтың төлемдерін азайтып, газды тиімді пайдалануға жол ашады деп сенім білдірілуде.

Бұл туралы Infohub.kz ақпарат агенттігі хабарлайды.

Газ есептегіштерін ауыстыру мәселесі

Парламент Мәжілісінің отырысында депутат Еділ Жаңбыршин газ есептегіштерін ауыстыру жұмыстарын газбен жабдықтаушы ұйымдар өз есебінен жүргізуі керектігін айтты. Қазіргі таңда елімізде 2,1 миллионнан астам тұтынушының есептегіш көрсеткіштері қолмен тексеріліп немесе тұтынушылардың өздері суреттерін мессенджер арқылы жіберуімен алынады.

«Кейбір абоненттер үйде болмайды немесе есептегіш құралдарына кіруге мүмкіндік бермейді. Бұл есепке алудың толыққанды және дәл жүргізілуіне кедергі келтіреді. QazaqGaz Aimaq жүйесіндегі 1,9 млн абоненттің тек 100 мыңы ғана қашықтан дерек беретін есептегіштермен жабдықталған. Осыған байланысты, қашықтан дерек беретін есептегіштерге кезең-кезеңімен көшу, газды есепке алудың бірыңғай цифрлық жүйесін құру ұсынылады. Бұл ретте есептегіш құралдарын ауыстыруды газбен жабдықтаушы ұйымдар өз қаражаты есебінен жүзеге асырады», - деді Жаңбыршин.

Әлеуметтік әділдік пен тиімділік

Депутаттың пікірінше, мұндай нормаларды газ саласына енгізу әлеуметтік әділдікті қамтамасыз етіп, қайта қалпына келмейтін ресурсты тиімді пайдалануды арттырады. Сонымен қатар, бұл халықтың төлемдерін азайтып, газды үнемдеуге алып келеді. Босатылған көлемдер өндіріс пен газдандырылмаған елді мекендерді газдандыруға бағытталады.

Айта кетейік, бұл түзетулер «Газбен жабдықтау және тауарлық газды үнемдеп тұтыну мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заң жобасына енгізілген. Бұл жобаны Мәжіліс бірінші оқылымда қарап жатыр.