InfoHub Logo

Шымкенттегі Жастар сарайында тегін жүзу секциясына жазылуға деген сұраныс ата-аналар арасында күтпеген толқу тудырды. Тіркеу басталмай тұрып, түн ортасынан бастап жүздеген адам жиналды, бірақ ұсынылған орындар саны тым шектеулі болып шықты.

Ата-аналардың наразылығы

Көптеген ата-аналар жылдар бойы балаларын жүзу үйірмесіне бере алмай жүргендерін айтып шағымданды. Кейбір ата-аналар таңғы сағат 8:30-да келсе де, тіркеу кезегінде 143-ші болып тұрғанын хабарлады. Ресми тіркеу сағат 10-да басталуы керек болған.

«Егер бізде ақша жеткілікті болса, мұндай қиындыққа тап болмас едік. Барлығы балаларын тегін оқытқысы келеді», - деп бөлісті жергілікті тұрғын Үлмекен Бимусаева.

Тағы бір тұрғын Үлжан Қонысова наразылығын білдірді: «Түнгі сағат үште адамдар ұйықтауы керек. Біз таңертең келдік, бірақ 200-ден астам адам жиналған. Бұл жағдайды реттеу қажет. Әр жолы осылай болады. Біз орта ғасырда өмір сүрмейміз ғой», - деді ол.

Әкімшіліктің жауабы

Жастар сарайы әкімшілігінің мәліметінше, бассейнге жазылу ай сайын жүргізіледі. Қазіргі таңда тек 50 орын бос. Бұл орындар сабаққа қатыспайтын немесе себепсіз жіберетін балалардың есебінен босайды. Сондықтан тек толық құжаттары бар 50 адам ғана қабылданады.

«Ата-аналар неге онлайн тіркеуге болмайтынын сұрайды. Бұрын онлайн тіркеу болған. Бірақ 2026 жылдан бастап платформа ауысқандықтан, ата-аналар жеке келуі керек. Бізде «Миндаль» платформасы қолданылады. Бассейн резеңке емес, мың баланы бірдей қабылдай алмаймыз. Әр топта 15 адамнан артық болмайды. Гигиена талаптары да бар», - деп түсіндірді әдістемелік бөлім меңгерушісі Ақмарал Жүнісова.

Оның айтуынша, бассейн жалпы алғанда мың баланы қабылдай алады, оның ішінде 100-ден астамы ерекше қажеттіліктері бар балалар. Сондықтан әр балаға жеке оқу кестесі жасалған.

Бұл туралы Infohub.kz ақпарат агенттігі хабарлайды.