InfoHub Logo

Шығыс Қазақстан облысы әкімінің бұрынғы бірінші орынбасары Жансая Омар алты жылға бас бостандығынан айыру туралы сот үкіміне шағымдануда. Ол сыбайлас жемқорлық әрекеттері үшін кінәлі деп танылып, жазаға кесілген болатын.

Бұл туралы Infohub.kz ақпарат агенттігі хабарлайды.

Сот кабинетінің деректеріне сүйенсек, Жансая Омар сот үкіміне апелляциялық шағым түсірген. Сот отырысы 20 мамыр күні сағат 11:00-де өтеді деп жоспарланған. Ол уақытқа дейін Омардың бұлтартпау шарасы қамауда ұстау түрінде сақталады.

Іс бойынша не белгілі?

Бұған дейін Шығыс Қазақстан облысы әкімдігінде сотталған басшының орнына әлі күнге дейін жаңа адам тағайындалмағаны хабарланған еді. Облыс әкімдігі жаңа тағайындау мәселесін апелляциялық соттың шешімі шыққаннан кейін қарайтынын мәлімдеді. Алайда, облыс әкімдігінің ресми сайтында Жансая Омардың деректері «Жетекшілік» бөлімінен алынып тасталған.

Жансая Омарға тағылған айыптар

3 сәуірде Өскемен қаласындағы ауданаралық сот Жансая Омарды алаяқтық және парақорлық әрекеттері үшін кінәлі деп танып, орташа қауіпсіздік мекемесінде 6 жылға бас бостандығынан айыруға үкім етті. Оның Toyota Camry автокөлігі тәркіленіп, мемлекеттік қызметте жұмыс істеу құқығынан өмір бойына айырылды. ШҚО прокуратурасы Омардың әрекеттері «мемлекеттік қызмет негіздеріне және қоғам сеніміне нұқсан келтіретінін» атап өтті.

Сотта Жансая Омар өз кінәсін толық мойындап, бірақ соңғы сөзінде соттан рақымшылық жасап, мерзімді айыппұлмен ауыстыруды сұраған болатын. Ол мемлекетке салмақ болмай, өз үлесін қосқысы келетінін айтып, қарызға батса да айыппұлды төлейтінін мәлімдеген.

Естеріңізге сала кетейік, ШҚО әкімінің орынбасарының ұсталғаны туралы ақпарат 13 ақпан 2026 жылы пайда болған еді. Сол кезде ресми органдар шенеуніктің «денсаулығына байланысты уақытша демалыста» екенін ғана хабарлаған.