InfoHub Logo

Атыраудағы резонансты қылмыстық іс бойынша күдікті ретінде ұсталған Сұлтан Сәрсемәлиевтің Индонезияда қолға түсуіне байланысты тың мәліметтер жарияланды.

Бұл туралы Infohub.kz ақпарат агенттігі хабарлайды.

Индонезиядағы операция

Индонезияның Солтүстік Ломбок полициясының комиссары Рикки Пурнаманың айтуынша, Сәрсемәлиевті ұстау кезінде қашуға әрекет жасаған. Алайда, полиция қызметкерлері оны қонақүйден шыға алмай тұрғанда ұстап алды. Бұл операцияға Индонезиядағы Интерполдың Ұлттық орталық бюросы, Солтүстік Ломбок полициясы және көші-қон қызметінің өкілдері қатысты.

Күдіктілердің Индонезияға келуі

Полиция дереккөздері Сұлтан Сәрсемәлиев пен Ақбаян Мұқанғалиева 2025 жылдың 14 желтоқсанында Малайзияның Куала-Лумпур қаласынан Бали аралына ұшып келгенін анықтады. Олар кейін Ломбок аралына барып, ұсталғанға дейін сол жерде тұрған.

Депортациялау рәсімі

Қазіргі уақытта Индонезия билігі екі күдіктіні Қазақстанға депортациялау процесін жүргізіп жатыр. Бұған дейін Қазақстан Ішкі істер министрлігі күдіктілердің ұсталу сәті көрсетілген бейнежазбаны жариялаған болатын.

Істің мән-жайы

Естеріңізге сала кетейік, 2025 жылдың 25 желтоқсанында Атырау облысы полициясы із-түзсіз жоғалған бір отбасының төрт мүшесіне іздеу жариялаған еді. Кейінірек, осы отбасының қызы мен күйеу баласының да байланыссыз кеткені белгілі болды.