InfoHub Logo

Қазақстандық танымал кәсіпкер Арсен Томский Олимпиада чемпионы Михаил Шайдоровтың әкесіне Audi Q8 автокөлігін сыйлайтынын мәлімдеді. Бұл туралы Infohub.kz ақпарат агенттігі хабарлайды.

Кәсіпкердің айтуынша, автомобиль Михаилдың әкесі Станислав Александровичке беріледі. Көлік қазіргі таңда Audi Almaty орталығында иесін күтіп тұр.

Чемпионға және оның әкесіне алғыс

Арсен Томский Михаилдың жетістігіне ризашылығын білдіріп, оның әкесіне арнайы алғыс айтты. «Михаилға осы қуаныш пен мақтаныш сезімі үшін алғыс айтамын. Бұл – шабыт сыйлайтын, ерекше стильдегі алтын жеңіс. Осындай табыстың бастауында тұрған адамға ризашылығымды білдіргім келеді. Сондықтан Audi Q8 көлігін чемпионның әкесіне сыйға тартамын», – деді кәсіпкер.

Әкенің ұлы үшін жасаған құрбандығы

Кәсіпкер Станислав Александровичтің бұрын ұлының спорттық арманы үшін өз көлігін сатып жібергенін еске салды. Михаилдың алғашқы бапкері болған әкесі баласының спорттағы жолына үлкен қолдау көрсеткен.

«Бір кездері ол ұлының арманы үшін өз көлігін сатты. Бүгін сол арман алтын жүлдеге айналды. Енді бұл көлік ортақ алғысымыздың белгісі болсын!» – деп жазды Арсен Томский.

Айта кетейік, Михаил Шайдоров – Қазақстан тарихындағы мәнерлеп сырғанаудан тұңғыш Олимпиада чемпионы. Бұған дейін әнші Димаш Құдайберген де спортшыға көлік сыйлайтынын хабарлаған болатын.