InfoHub Logo

ҚР Президенті Қасым-Жомарт Тоқаев Алматының туристік әлеуетін күшейту үшін қала әкімдігіне ауқымды міндет жүктеді: мегаполис қонақтар үшін тәулік бойы қолжетімді «ұйықтамайтын қалаға» айналуы тиіс. Бұл қадам шағын және орта бизнеске жаңа мүмкіндік ашып, жұмыспен қамтуды арттыруға бағытталған.

Бұл туралы Infohub.kz ақпарат агенттігі хабарлайды.

Туризмді бәріне қолжетімді ету

Президент Turkistan газетіне берген сұхбатында Алатау баурайындағы тау кластерінің әлеуеті зор екенін атап өтті. Ол тек табысы жоғары туристерге емес, орташа кірісі бар азаматтарға да бағытталуы керегін айтты. Тоқаевтың пайымынша, туристік инфрақұрылымды әртараптандыру — негізгі міндет.

«Туристік инфрақұрылымды әртараптандыру қажет», — деді Мемлекет басшысы.

Кадр тапшылығын жүйелі шешу

Саладағы білікті маман жетіспеушілігіне тоқталған Тоқаев Түркістанда Халықаралық туризм және қонақжайлық университеті құрылғанын еске салды. 2024 жылы оның алғашқы түлектері еңбек нарығына шықты. Президент бұл жеткіліксіз екенін айтып, кадрлық дефицитті жабуға қосымша шаралар қабылданатынын мәлімдеді.

Халықаралық назар: Алматы — «стиль астанасы»

Тоқаевтың сөзінше, жетекші әлемдік басылымдардың елімізге қызығушылық білдіруі — дұрыс бағыттағы белгі. CNN Travel 2025 жылы Алматыны Орталық Азияның «жаңа стиль астанасы» деп атады. Бұл мәртебе сервисті күшейтіп, қаланың туристік тартымдылығын арттыруды талап етеді.

Инфрақұрылым, абаттандыру және жарықтандыру

Президент қала әкімдігіне Алматыны қонақтар мүддесіне сай тәулік бойы жұмыс істейтін мегаполиске айналдыруды тапсырды. Оның ішінде инфрақұрылымды жаңарту, қоғамдық кеңістіктерді абаттандыру және көшелерді жарықтандыру бойынша әлі де көп жұмыс бар екенін атап өтті.