InfoHub Logo

Түркістан индустриалды-техникалық колледжінің жатақханасында студент қыздарды ерлер бөлмелері мен дәретханаларын тазалауға мәжбүрлегені туралы видео әлеуметтік желіде жарияланды. Видеода жатақхана комендантының қыздарға «Сен қыз емессің бе?» деп айқайлап, оларды ерлер бөлмелерін жууға көндіруге тырысқаны көрінеді.

Бұл туралы Infohub.kz ақпарат агенттігі хабарлайды.

Коменданттың қыздарға қысымы

Видеода жатақхана комендантының студент қыздарға: «Сен күнде тазаламайсың ғой. Ертең комиссия келеді, бөлмені жусаң не болады? Сен қыз емессің бе?» деп айқайлап жатқаны естіледі. Ол қыздарды ерлер бөлмелері мен дәретханаларын тазалауға мәжбүрлеп, бас тартқан жағдайда жатақханадан шығарып жіберетінін айтып қорқытқан.

«Мен тек өзім тұратын бөлмені ғана тазалаймын. Неге біз жігіттердің бөлмелерін тазалауымыз керек? Жігіттер келгенде өздері тазаласын», – деп жауап берген қыздардың бірі.

Ресми жауап

Түркістан облыстық білім басқармасы бұл жағдайды бақылауға алғанын және арнайы комиссия құрылғанын хабарлады. Колледжде 1072 студент оқиды, оның 80-і жатақханада тұрады. Білім басқармасының мәліметінше, 23-25 ақпан аралығында өңірде облыстық спартакиада өтетіндіктен, оған қатысушыларды жатақханаға орналастыру қажеттілігі туындаған. Осыған байланысты, бос бөлмелерді тазалауға көмек сұрап, студенттерге, соның ішінде қыздарға да, ауызша өтініш жасалған. Жігіттер уақытша болмағандықтан, қыздардан көмек сұралған. Бұл жағдай түсініспеушіліктен туындаған жанжал екені айтылды.

Қазіргі уақытта студенттермен және олардың ата-аналарымен түсіндіру жұмыстары жүргізілуде. Ведомство студенттердің құқықтары мен қауіпсіздігінің қамтамасыз етілетінін және жауапты тұлғаларға заң аясында шара қолданылатынын атап өтті.