InfoHub Logo

Қазақстанда банктік шот ашу тәртібі жаңарып, 2026 жылғы 11 қаңтардан бастап талаптар қатаңдайды. Ұлттық банк жеке мақсаттағы шоттар мен кәсіби/кәсіпкерлік кіріс түсетін шоттарды айқын ажыратуды енгізіп, азаматтар үшін жауапкершілікті күшейтеді.

Бұл туралы Infohub.kz ақпарат агенттігі хабарлайды.

Неге өзгерді: жеке және кәсіби табыс бөлек жүргізіледі

Банктік шоттарды ашу, жүргізу және жабу қағидаларына өзгерістер енгізілді. Енді жеке тұлға шот ашқанда, оны кәсіпкерлікке немесе белгілі бір кәсіби қызметке пайдаланбайтынын жазбаша растауға тиіс (банкпен бөлек келісім болмаған жағдайда).

Тыйым кәсіпкерлік қызметке, арнайы салық режимі аясындағы өзін-өзі жұмыспен қамтуға, нотариат пен адвокаттық қызметке, атқарушылық құжаттарды орындау саласына (жеке сот орындаушылары), сондай-ақ медиация тәртібімен дауларды реттеу қызметіне қатысты.

Ағымдағы шотқа қосымша рұқсат талап етіледі

Ағымдағы шоттың жекелеген санаттарын ашу үшін клиент банкте бюджетті атқарудың орталық уәкілетті органының рұқсатын ұсынуы керек. Рұқсат құжаттары қазынашылық атқару рәсімдеріне, кассалық қызмет көрсету қағидаларына және қазынашылық есеп пен мониторинг тәртібіне сай рәсімделуі тиіс.

Өзін-өзі жұмыспен қамтығандарға бөлек рәсім

Арнаулы салық режимі шеңберінде қызмет істейтін жеке тұлғалар (оның ішінде қандастар) ағымдағы шот ашқанда екі құжат береді: жеке басын куәландыратын құжат және салықтық арнаулы режиммен шот ашу туралы өтініш. Өтініш Салық кодексінің 77-бөліміне сәйкес ресімделеді.

Ғылыми гранттар мен эскроу: төлемдер қалай жүргізіледі

Қолма-қолсыз төлемдер қағидаларына да түзету енгізілді. Ғылыми және ғылыми-техникалық жобаларды гранттық қаржыландыру шеңберінде нәтижелерді коммерцияландыру кезінде грант алушының атына ашылған эскроу режиміндегі ағымдағы шоттан төлемдер тек шарт негізінде және контрагенттің банктік шотына аударылады.

Күшіне ену мерзімі

Өзгерістерді бекіткен қаулы 2025 жылғы 31 желтоқсанда қабылданды және 2026 жылғы 11 қаңтардан бастап күшіне енеді. Осы күннен бастап банктер мен клиенттер жаңартылған талаптарды басшылыққа алады.