InfoHub Logo

Қазақстан Республикасының Ұлттық банкі макроэкономикалық сарапшылар арасында жүргізілген кезекті сауалнаманың қорытындысын жариялады. Бұл сауалнама Brent маркалы мұнайдың бағасы, Қазақстан экономикасының өсімі, инфляция, базалық мөлшерлеме, тауарлар мен қызметтердің экспорты мен импорты, сондай-ақ теңге бағамы сияқты маңызды көрсеткіштерге қатысты болжамдарды қамтиды.

Бұл туралы Infohub.kz ақпарат агенттігі хабарлайды.

Мұнай бағасы мен экономикалық өсім

Болжам горизонты бойынша Brent маркалы мұнай бағасының болжамы жоғары қарай қайта қаралды. 2026 жылы мұнай бағасы барреліне орта есеппен 86,1 долларға (бұрын – 80 доллар) жетеді деп күтілуде. 2027 жылы бұл көрсеткіш 75 долларға (70 доллар), ал 2028 жылы 70,5 долларға (70 доллар) бағаланады.

Қазақстан экономикасының өсіміне қатысты болжамдар айтарлықтай өзгерген жоқ. Орта мерзімді перспективада ЖІӨ өсімі әлеуетті деңгейге біртіндеп жақындайды деп күтілуде: 2026 жылы – 4,9%, 2027 жылы – 4,7%, 2028 жылы – 4,3%.

Доллар бағамы

Теңгеге қатысты доллар бағамының болжамы алдағы екі жылға төмен қарай қайта қаралды. 2026 жылға арналған болжам – 498,8 теңге (бұрын – 515 теңге), 2027 жылға – 531,5 теңге (532,5 теңге), 2028 жылға – 562,5 теңге (550 теңге) болады деп жоспарлануда.

Инфляция және базалық мөлшерлеме

Респонденттердің инфляциялық күтулері орта мерзімді кезеңде біршама жақсарды. 2026 жылға арналған инфляция болжамының медианасы 10% деңгейінде сақталды. Ал 2027 және 2028 жылдарға арналған болжамдар тиісінше 8% және 6,8%-ға дейін төмендетілді (бұрын – 8,6% және 7%).

Базалық мөлшерлемеге қатысты күтулер де түзетілді. 2026 жылы болжам медианасы 16% құрады (бұрын – 15,9%). 2027 және 2028 жылдары инфляциялық күтулердің жақсаруына байланысты бұл көрсеткіштер тиісінше 12,8% және 10,6%-ға дейін төмендетілді (бұрын – 13,3% және 11,3%).

Сауалнамаға қатысушылар

Сауалнамаға Қазақстанның макроэкономикалық көрсеткіштерін талдаумен және болжаумен айналысатын 16 ұйым қатысты. Респонденттер қатарында кәсіби нарық қатысушылары, зерттеу институттары, халықаралық ұйымдар және рейтингтік агенттіктер бар.

Бұл макроэкономикалық сауалнама Ұлттық банктің ресми болжамдарын қамтымайды. Ол кәсіби нарық қатысушыларының қазақстандық және әлемдік нарықтардағы жағдайдың дамуына қатысты тәуелсіз пікірлері мен бағалауларының шолуын ұсынады.