InfoHub Logo

Demalys kúni bolatyn. Abzal JenPI-ge Jámılaǵa bara jatqan. Avtobýsqa minip bılet aldy da, úmittene kóz salyp edi, kútkenindeı «baqytty bılet» eken. «Jolym bolady» dep túıdi ishinen. Avtobýstan túsip solaı qaraı bettep bara jatqanynda, tanys jigiti qarsy ushyrasty.

— Qaıda jortyp bara jatqanyń belgili. Jolyń bolsyn, — dedi jymıa kúlip.

— Rahmet! Jolym bolsa bolar, jańa «baqytty bılet» aldym. Samattyń kóz aldyna bıletti taqap kórsetip qoıdy.

— Tilektespin! — dedi Samat.

— Rahmet!

Abzal bıletti búktemeı tós qaltasyna bloknottyń arasyna salyp qoıdy.

Jataqhananyń janyna kelip ishke kirdi de, kezekshi qyzǵa shaqyrtyp edi, «joq» dep keldi. Sonda da senbeı ózi biletin terezeniń tusyna kelip kórer degen nıetpen arly-berli júrip edi, biraq jan shyqpady. Abyrjyp az ǵana turdy da, basy salbyrap keıin qaıtty. «Endi qaıda barsam eken?» Syrahanaǵa barýǵa uıǵardy.

Onda aýyldas jigitteri otyr eken. Almatyda «slýjıt» etip júrgen Arystanbaı da bar. Bul kezdesýge bári de qýanysyp, qaýqyldasyp qaldy. Olar «kel, kel» desip kópirshigen syralaryn juta tústi. Ózderi ájeptáýir qyzara bórtip te alǵan...

Olar dalaǵa shyqqanda ýaqyt túngi toǵyzǵa taıap qalǵan. Aspandy qoıý qara bult torlaǵan. Abzal jerlesterimen qoshtasty da, JenPI-ge qaraı ekinshi ret bet túzedi.

Jámıla kelgen eken. Qyzdar bolyp kınoǵa barypty. «Qydyraıyq» dep munyń qıyla suraǵanyna qulaq aspasa da, «jarty saǵattaı áńgimelesip júreıikshi» degenine «sózińde tur» dedi Jámıla kelisken syńaımen.

Ekeýi aq qaıyńnyń saıasyna kelip toqtady.

— İship alypsyń ǵoı, Abzal, munyń ne? — dedi Jámıla.

Abzal ol suraqqa jaýap bergen joq. Shap berip Jámılany qushaqtaı aldy da, «súıemin seni» dedi ónboıy diril qaǵyp. Kópten jetkize almaı júreginde saqtap kelgen sózin bir-aq sátte aıtyp saldy. Qushyrlana erninen súıip te úlgerdi...

Jámıla mundaı tosyndyqqa qatty abdyrap qaldy. Kenet Abzaldy jaǵynan tartyp jiberdi de, jataqhanaǵa qaraı júgire jóneldi. Abzal qýyp jetip qaıta ustap alyp edi, «jiber!» dedi ol yshqyna aıqaılap.

Shyńǵyrǵan qyz daýysyn estigen jaqyn mańdaǵy Kırov atyndaǵy zaýyttyń jataqhanasynyń jumysshy jigitteri jetip keldi. Eshteńe dep surap jatpastan tolyqsha kelgen bireýi Abzaldy ıeginiń astynan sylqyta soqty. Bosanyp shyqqan Jámıla júgire jónelgende, Abzal shalqasynan qulap bara jatyr edi...

Aýzy-murny dal bolǵanyn Abzal ertesine aınaǵa qaramaı-aq bildi. Denesi qara zil-batpan. Kóziniń aldy shodyraıyp isip ketken. Badyraq kózi syǵyraıyp qalypty. Beıne bir óziniki emes sıaqty.

Ol ertesine eki túrli oıdy saralady. Alaıda, bir sheshimge kele almady.

«Úıge aman-esen jetkenim jaqsy bolǵan...»

«Jámılany súıgenim batyldyq boldy». Sol bir sátti kóz aldyna elestetip jymıyp qoıdy.

«Al endi osynaý kúıge ushyraýyma ne sebep boldy? El aman, jer amanda jaralanyp! Aqylsyzbyn, jigersizbin», dep bir qoıdy.

«Jámıla qatty renjip ketken joq pa eken? Nege súıdim?» Bul saýalyna jaýap taba almady.

Kóp uzamaı Jámıladan hat aldy. «Abzal, sálem. Keshir, qalaıda habarlas», dep qysqa jazypty. Tóbesi kókke eki eli jetpeı qalǵandaı, kóńil-dónen sharyqtap alyp ushady. Solaı qaraı sol sátte-aq tartyp ketti. Shaqyrtyp edi, bar eken. Ol júgirip keldi de, muny qushaqtaı alyp jylap jibersin kelip...

Bir sáttik kilt únsizdik. Abzal dittegeni bolyp, báriniń qalypqa kelgenine endi kózi jetti. Jámıla Abzaldyń janqaltasynan bloknotyn alyp «men de seni súıemin» dep jazdy. Qaıta ornyna qoıǵaly jatyr edi, arasynan baıaǵy bılet sýsyp tústi. «Baqyttysy...» Abzal ony jerden shapshań kóterip aldy da, Jámılaǵa kórsetti. Biraq, túsindirip jatpady. Tek qana jáılap kúbirlep:

— Baqytty bılet, men endi baqytty bolamyn, — dedi jansyz nársege til qatyp.

1979 jyl.

---