InfoHub Logo

nemese eń kúshti Aıaz Ata

Túski tamaqty ishýge úıge úlken balam Raýan ekeýmiz bir mezgilde kelgen ekenbiz, ádettegishe tórtinshi qabatqa kóterilip, syrtqy esikti qaqtyq. Esikti ashqan jańa túsken kelinim bizge qarap múdirmesten: «Úıge Aıaz ata keldi ǵoı, Shárbanýdy quttyqtaýǵa kelipti», — dedi. Reńinde rıza kóńil, jyly jymıý bar. Kóńilge esh kúdik alǵan joqpyz. Kerisinshe, ıa, saý bolǵyr-aı degendeı, jaqsylyǵymen, sharapatymen kelgen kisige ishimiz jylyp qaldy. Syrtqy esikti ashqandaǵy qarsy bólmedegi jer ústel janynda otyrǵan kishkentaı qyzym Shárbaný qasyndaǵy «Aıaz atasy» jáne bir ǵajaby, tor ishindegi totyqusy úsheýi bizge aıtarlyqtaı áser etti. Sol kishkentaı qyzymnyń oılamaǵan jerden tisi qatty aýyryp, jaǵy tompaıyp isip, dál sol kúni bolatyn «Álippemen» qoshtasýǵa da bara almaı erteńgilik qatty qynjylǵanyn, jylaǵanyn kórgen men, aınalaıyn aıaz atam-aı, myń jasaı gór, bárinen de syrqat balanyń mereıin ósirgenin-aı búgingi, degendeı ishki tolǵanysym boıymdy kernep ketti. Arǵy bólmege óte bererde betine óte jarasymdy, týra sol aıaz Atanyń beınesindegi maska kıgen áıel adamnyń (qyz balanyń) syrtqy kıim kıisine kóz qıyǵymdy tastaı ótkenmin. Tym jaqsy sarǵysh tústi dýblenkasy, qap-qara shashy bar... Basqa eshteńesin baıqamadym. İshki oıym aıtty sonda: «Mynaý jas muǵalim qyzdardyń biri bolǵany-aý. Álde, aldyn-ala quttyqtaýǵa kelip, Shárbanǵa syılyq ákelip otyrǵan aǵaıdyń qyzy Aıgúl me eken?» Mine, jumbaq. Sheshýi óte qıyn. Ol jumbaqtyń kúrmeýin álgi maskany sheshpeı turyp sheshý — múmkin emestiń múmkin emesi.

Sóıtkenshe, syrtqy kúrtemdi ilgenimshe, bul joly da kelinniń jumsaq shyqqan daýys estildi.

— Bapa, Aıaz ata sizdi sóılesýge shaqyryp jatyr, — dedi ol.

Kostúm-mastúmderdi aýystyrýǵa da mursham bolmaı qyldy. Álgi bólmege qaraı keri oralyp, «saý-salamatsyz ba, Aıaz ata, assalaýmaǵaleıkým, hosh keldińiz, rahmet Sizge erteletip kelgenińizge, myń jasańyz», — degendeı uzyn-shubaq sózdermen des bermeı, demdeı, jeteleı, terbete bergenmin. Sol kezde sizge ótirik, maǵan shyn, álgi boıjetken jáı yrǵalyp ornynan turdy da, týra maǵan qaraı bettedi. Tipten jaqyn kelip te qaldy-aý. Sheginemin be qaıtem tipti? Óte bir túsinbestik, yńǵaısyzdaý jaǵdaıdamyn. Al ol bolsa aıylyn jıar emes, aldyndaǵy kisiden yǵar emes. Minekı, maǵan tup-týra, betpe-bet jaqyn kelip qaldy!.. Áı, saspaǵan júrek, qoryqpaǵan kóńil, qaıtpas qaısar minez, taýyńnan da, jaýyńnan da taısalmas batyrym-aı!.. Bu ne bolǵanyń úrgelektenip, úrkip, manaǵy arǵy jaqtan quıylǵan sózdiń seli de sarqylǵandaı ma, tym abyrjyp kettiń-aý...

Sol kezde, sol kezde...

Ol meni qatty qysyp qushaqtap aldy da, maskasyn betinen julyp aldy!

Kim deısiz ǵoı, ıá kim deısiz?

Sóz joq, shydamyńyz jetpeı tańǵalyp otyrsyz.

Ol meniń ózim syndy, kózim syndy asyl Adam!

Ol meniń Almatyda joǵary oqý ornynda oqıtyn úlken qyzym Raýshan eken!

Jeltoqsannyń 20-na bılet aldym, 23-de baram dep, al shyn mánińde bıletin 18-ne alyp, 21-i kúni súrprız jasap eki kún erte kelip turǵan qyzymyzdyń bizdi aldaǵanyna túk te qysylǵan joqpyz. Kerisinshe, saǵynǵanda eki jyldaı kórinetin eki kúnniń buryn bolǵanyna qatty qýandyq.

Bárinen buryn men onyń osynsha ustamdylyǵyna, úsh kún boıy poıyzda kele jatqanynda da syr bermegenine tánti boldym.

Al ózimdi shamalyny ańǵara biletin kisi sanaıtyn meni óz qyzymnyń jańajyldyq «súrprız» dep ońdyrmaı aldaǵany eshqashan esimnen kete qoımas. Áı, qatyrdy-aý!

Qyz bala tilekshi deıdi ǵoı, qaıda júrseń de aman-saý bol, balam! Órkeniń óssin! Sen endi men úshin eń kúshti Aıaz atasyń!

Iá, Jańa jyl, merekeler qarsańynda oraıyn tapsa, aldaýdyń da asqan táýiri, paıdalysy, ótiriktiń de ózekti, ómirsheńi bolady eken-aý.

Ómirde ne bolmaıdy, bári de bolady eken ǵoı.

---