InfoHub Logo

Kogda ýje ochen daleko ýıdesh po jıznennomý pýtı, to zamechaesh, chto popal ne na tý dorogý.

P. Býast

...Otyz úsh jyl ótipti. Órge shyǵamyz dep edik, yldıda sekildimiz. Bel asamyz dep edik, betkeılep kele jatqandaımyz áli.

On beste edim. Ańǵal edim. Pák edim.

Iá, qum qamaǵan buıyǵy aýyldyń momaqan balasy, on beste ediń sen. «Aqyn bala» degen ataǵyń aýdan alabyna aıan. «Sen de on beste, quralaı, men de on beste...» nemese «Ol kezde sen de on beste, men de on beste...» dep keletin óleńder bar bizdiń jaqta. Ekeýin de seniki deýge bolady. Biraq, on bes jasyń ózińdiki emes eken...

Tyraý-tyraý tyrnalar bultty oıǵanda aýylǵa keldi Gúlmıra. Qazir sony eske alǵanda, áńgimelegende «Aýylǵa sıvılızasıa kelgendeı bop edi» dep qoıasyń keıde. Aıtqandaı, bizdiń bala bastan keshken kep týraly el jaqtaǵy jazýshy kókem de támsil tartqan. Biraq, naqty bolǵan jaıdy keıipkerdiń ózinen tyńdaǵan abzal bolar.

Aýyl-úı arasynda kórikti qyz az emes. Gúlmıra solardyń bárinen bólek. Úlbir júzine qaraqat janary, búldirgen erini, jaıbaraqat ańtarylǵan kirpikteri shaqtap tartylǵan. Aýyl-úıdiń túbit murttaryna qyrdan qashqan túlkideı boldy Gúlmıra. Qyran qaıda shúıetin? Aýyl jigitteri qyzdarymen arazdasyp qala berdi-aý jıi. Momaqan aqyn bala onshaqty úıli ortanyń «bas aqynyna» aınalǵan sol jyly. Gúlmıra úshin, Gúlmıra dep. Áýeli óz qatary qolqalaǵan: «Gúlmıraǵa hat jazyp ber. Óleńmen». Aqyn ataýly saýdaǵa shorqaq – qıylǵan dosty kóp qınamaı jazady. Tegin. Rahmetin alady. Erteńine kelesi ǵashyq. Aqyn bala da bir jazǵan óleńdi qaıtalaı almaıtyn dertke shaldyqqan eken. Júregin qos qolyna ustap, shyǵyrshyǵyn julyp alǵan jarylǵysh granat ýystaǵandaı bop, sál bosatsa, atylyp ketetindeı, bozara, sol júrekpen birge dir qaqqan Májnúnge – jańa jyr. Májnún – máz. Gúlmırany umytyp, óleńge, hatqa, sony aparatyn ózine ǵashyq bop máz. Aqyn balanyń júregine túsken qara bas óleń qurty aýyldyń alpys ǵashyǵynyń qusnıhatynan nár alyp, ósip keledi. Aqyry, aıamaı shaqqan. Májnúnderdiń tapsyrysynan bosap, ońasha oıǵa qalǵan kúni shaqqan. Tap qolqadan. Kúretamyr býylyp qalyp, júrek baıǵus atqaqtaıdy. Júzdegen ǵasyr jasyrynyp kelgen janartaý derlik. Taý qyrtysyn jamylǵan qatpar-qatpar qalyń qoz lyqsyp shyqpaqqa áýre.

Sol kúni bul da kórgen Gúlmırany. Buryn da kórdi ǵoı. Bir synyp tómen oqıdy. İshteı yntyq. Sezimin ózge Májnúnderdiń atynan tizgen hatqa mórlegen. Bir kúni áskerden sol kúzde oralǵan Noqaı (shyn esimi jadydan óshken) ótinishpen keldi. Noqań da Májnúnder áskerine qosylypty. «Sen maǵan Gúlmıraǵa arnap hat jazyp beresiń. Aýyldyń kúlli boqmurynyna jazypsyń ǵoı. Maǵan jazatynyń olardyń bárinikinen artyq bolýy kerek. «Avıa» konvert satyp alǵanmyn. Qazir otyr da jaz. Áıtpese...» Ótinishi – óktem, ózi – ozbyr. Atylaıyn dep jatqan janartaýdan aýyr bir yńyranys lyqsyǵan. Ábden pisip-jetilgen taý jarasy syzdap syr bererde, etegindegi bulaq-qaınarlardyń kózinen burqaqtar sýy ýly siltige aınalyp, qaınap ketetin. Munyń da janaryna jas kepteldi. Yza men sharasyzdyq. «Mahabbat ǵadaýatpen maıdandasqan, qaıran meniń júregim muz bolmaı ma...» degen aqyndy túsine ketken. Muz basyp jatqan janartaýlar da bolady. Ol atylsa, sel basar bolar mańaıdy. Bul da seldetsin óleńdi. Jo-joq, janartaýy atylmaǵan – alǵashqy zildi kúrsinisiniń ózi kórkem jyrǵa aınalǵan.

Ár jolynyń sońy «Gúlmıra» dep aıaqtalatyn, sıqyrly názik notalarmen oınaqshyǵan mýzyka edi ol óleń. Noqaıdan mundaı sezimdi Gúlmıra kútpesi anyq. Tasyn qanshama ǵasyr qyna jep, mújip, moryp ketken taý da bir – Noqaıdyń júregi, sezimi de bir. Ondaı taýdyń basyna qyltanaq ta turaqtamas bolar. Aqyry, hat tuıyqtalǵan. «Úzdige habar kútýshi Noqaı. M.S.S.» degen abrevıatýramen. «Men sizdi, jo-joq, Noqaıdyń atynan bolsa, seni ...súıemin» degen. Áńgimeniń kókesi hat jazylyp bitken soń bastaldy. «Endi osy hatty myna konvertke sal. Silekeıińdi shubyrtpaı, baıqap jelimde. Tura-tur» Noqaı qaltasynan kishkene quty alyp shyǵyp, konverttiń ishine qarata «pysh» etkizdi. Odekolon. «Qý qyzdyń tanaýyn qytyqtasyn. Al, endi iske kiris». Konvert jelimdengesin, Noqań sezim arqalaǵan jup-juqa hatty alaqanyna salyp, salmaqtap baıqady. Júzinde abyrjý bar. Tilinip ketken erinin jalap, murnyna taqady. «Muny endi óziń aparasyń. «Syı qylsań sypyra qyl, jazǵyshbek! Aǵasymen dossyń ǵoı. Senen esh kúmán týmaıdy. Meniń úlken basymmen shúıkedeı shıborbaıǵa baryp turǵanym yńǵaısyz emes pe, a?!» Atylarman janartaýdyń bir búıirinen aq bult tústes bý syzdyqtap shyǵa bastaıtyny bar ǵoı. Sol ispetti, demi jıilep, alqyna bastaǵan aqyn bala. «Júr, kettik». Kónbeske, shara káne? Gúlmıranyń úıi aýyldaǵy jalǵyz projektordyń túbinde edi. Noqaı sút jaryq aqtarylǵan baǵannyń túbinde qaldy. «Keshikpeı shyq. Myljyp, otyryp alma. Men kútem. Jaýabyn dereý aıtsyn!» Álginde Noqaı salmaqtaıtyndaı-aq eken, konvert – zil batpan. Tósqaltaǵa tyqqan aqyn balanyń júreginiń syzdaǵan jaraly aýyzyna, qolqa tamyryna batyp barady. Eńkish tartyp úıge kirgen. Jer asty dúmpýi bolar qarsańda qatpardaǵy qalyń qozdyń qyzýy taý baýyrynyń topyraǵyn dýlatyp, qyzdyryp, erekshe kúıge bóler edi. Munyń alaqany dýyldap, ot shalyp, kúımegendeı qalypta. Ystyq ótip, ter qursap, býlyqqan tárizdi. Aýzyn ashsa, jalyn qusarman, shoq shashyp, demimen qarıtyndaı. Qyz aǵasy – dosymen áńgime qurǵan bop otyryp, qaǵaberiste buǵan juǵysyp, az-kem suhbattasýǵa yqtıar Gúlmıraǵa hatty usyndy. «Seniń ózińnen be?» dedi janary jalt oınatqan «Ózge sıvılızasıa ókili». «Noqaı berip jiberdi. Jaýabyn kútip, esik aldynda tur». Jalqyn nur shashqan janar oty óshkendeı boldy qyzdyń. «Ondaı bolsa, almaımyn. Ózine aparyp ber, poshtabaı!» Jalt-jult etken janarynyń gaýhar tastary myń qubylyp, ókpeshil qyz óz bólmesine ketti. Buǵan da aıal joq endi. Áp-sátte bar salmaǵynan aıyrylyp, qaýyrsyndaı bop qalǵan «Avıany» jan qaltasyna jytyra sap, úıden shyqqan. Noqaı sham túbindegi túnniń bir ýys jyrtyǵynda jarbıyp, shylym shegip otyr. «Iá, poshtabaı, ne boldy?» Noqaıdyń aýzyna aýysqan qyzdyń sózi namysyn shabaqtaǵan bul odan ármen túnerdi. «Keregi joq hatyńnyń. Áýre bolmasyn!» dedi». «Sen durys bermegensiń ǵoı. Qyzben sóılesý bilmeıtin boqmuryn neme!» «Myqty bolsań, óziń barmadyń ba?» «Ne deısiń, eı? Meniń sendeı «dýhtarmen» kisishe sóıleskenime semirgen ekensiń!» Ómirden soqqy jemeıtin aqyn joq. Ásirese, Noqaı syndy dúleı dúmbilezder daryn ataýlyǵa ósh keledi ǵoı. Ony aqyn bala bilmeıdi, árıne. Bókterin aýyl-úı kúresin qylatyn qotyr tóbeshikterdiń jeldi kúni kenet shańytyp, yǵyndaǵy jazırany sasytatyny bar. Noqaıdyki sol edi.

Úsh kún úıden shyqpady taǵdyrdyń alǵash soqqysy Noqaı bop tıgen aqyn. Bir jaǵynan, qyz aldynda betimen jer súzgen namysy, Noqaıdyń kúrzi judyryǵy dombyqqan biteý jaraǵa aınaldyrǵan júzi, ekinshi jaǵynan, aýylda eshkim tik kele almaıtyn dókirdi sózden jyqqandyǵy, ám qyzdyń «Hat senen be?» dep qýanyp kelip, budan emes ekendigin sezgende jabyrqaǵany munyń asaý, deli júregin sap-sap sabyrǵa keltirip, sabasyna túsirip, saıabyr taptyrǵan. «Mahabbat ǵadaýatpen maıdandasqan...» deıdi yńyldap.

Úsh kún Gúlmırany oılady. Májnúnder taıpasynyń atynan joldanǵan hattaryn oısha tizip, búkil óleńdi qaıyra jazyp shyqty. Eń jobalysy, Noqaıdyń qoly qoıylǵany eken. «Kúlli el qozǵalyp jatqanda, meniń tirshilik jasamaǵanym ábestik eken» degen ishinen. Aqyry Noqaıdyń hatyn qaıyra jazyp, óńdep, basqa konvertke salyp, qyz úıine qadam týralady. «Ózimnen! Shyn nıetimmen» degen. Ózge aıtqany esinde joq. Sirá, jarytyp, sóılem qurastyra almaǵan. Janartaýdyń zil kúrsinisteri jıilep, aýa shytynap, attas zarádtar tebise bastaǵan. Mundaıda taý qoınaýyn aralar jańǵyryqtar da tyıylyp, áýe aýyr yrǵaqta lyqsyp, jerge jabysarman bolar edi.

«Jaýabyn erteń aıtamyn. Keshke. Bıge barǵanda». Bir jarym táýlik – «Ǵasyrdan da uzaq kún». Bálkim, daýyl aldyndaǵy tylsym tynyshtyq. Úmit pen kúdik kezek súıgen jaraly júrek qaǵaz jaıylǵan dastarqan basyna qaraı tarta bergen. Júrek túbindegi qara bas qurt qolqasyn solqyldata soryp, judyryqtaı et sazyp, beımálim sazdar syńsı beredi qulaǵynda. «Aı alqaly, Kún syrǵaly Gúlmıra!» Bir táýlik – jıyrma tórt saǵatta qyzdyń sıqyrly áýezdi esimin myń qaıtalady. Erteńinde matematıkadan «eki» aldy.

Álqıssa, bı keshi. Gúlmıra joq. Sońǵy klasta oqıtyn bularǵa esigi aıqara ashyq sovhoz klýbyna tómen klass balalaryn kirgizbegen. Topty Májnún muny ańdyp áýre. Biri – tilektes, biri – básekeles. Aqyry, qyz úıiniń mańyna baryp, áýezdi ysqyryǵyn salǵan. Jarty saǵattan astam ýaqyttan soń, kireberistiń terezesinen sham sáýlesi bilinip, syrtqy esik sál ashylyp, qyzdyń basy kórindi. «E-heı, Esenın! Qaıdasyń?» dedi qyz. «Basqa bireýi bar eken ǵoı?! Zalym qyz!» Ashýǵa býlyqqan bul ketip bara jatqanda, taǵy da «Eı, qıalı aqyn! Qaıda qashyp barasyń?» degen qyz daýysy jetsin qulaǵyna. Qustaı ushyp jetkenin biledi. «Esen» dediń ǵoı óziń» degen. «Esenın» dedim. Sondaı aqyn bolǵan orysta. Qyzdarǵa óleń jazýdyń masteri – sen sekildi. Má, barlyq shyǵarmashylyǵyń» dep, Májnúnderdiń atynan kelip, sol kúıi ashylmaǵan hattardy qolyna ustata saldy. Sergeı Esenın degen aqyndy oqymapty bul. Shalǵaıdaǵy aýylda orys tili, ádebıetiniń muǵalimi joq edi. «Meniń jaýabym – osy. Al seniń hatyńdy álbomyma flomastermen kóshirip jazyp qoıdym. Esenındi oqyǵan soń kelesiń» degen.

Esenın shynynda myqty eken. Sulý jyrdyń serisi eken. Keıin sol Esenın atyndaǵy medaldi keýdesine qadaıtynyn oılady ma eken?! Al, Gúlmıra ekeýi sol keshten soń juptaryn jazbaǵan. On jyldyq bitirgen aqyn bala jylqyshy bop ketti.

«Bozkóldiń jylqy jaıdym jazyǵyna,

Baılandym bir sezimniń qazyǵyna...» dep, dalany jańǵyrta án salatyndy shyǵarǵan. Gúlmıra mektep bitirgen soń, ıaǵnı, keler jyly oqýǵa birge attanbaq. Almatyǵa. Almatyda aqyndar ortasyna baryp, Arqadan kep, aq shatyryn aspanǵa tikpek armany bar balanyń.

Taǵy da kóktem kelip, tyraý-tyraý tyrnalar kókke syna qaqqan. Gúlmıra mektep bitirer kesh te taıaý. Jalpaq jazıraly dalany erkin kezgen qıalshyl bozbalanyń keýdesi de solyǵy basylyp, qaıyra uıqyǵa ketken janartaýdaı bolady. «Júregim meniń – janartaý» degen ataıy aqyndy jattaǵan jyldar edi. Jaısań jaz jadyratqan kúnderdiń birinde mektep bitirýshiler keshine daıyndalyp jatty buıyǵy aýyl. Qyrsyq qylǵandaı, sol kúni alasapyran daýyl, aǵyl-tegil nóser oınaǵan dala sahnasynda. Yqqan jylqy, ydyraǵan úıir. Daýylsúıgish aqyn bala ketti Bozkól aınalyp. Eki kún, eki tún alaly úıirdiń sońynda attan túspegen jylqyshylar dúısenbi kúni keń qaqty kókteı ótip, aýylǵa kep jyǵyldy. Jylqy jaılaýǵa oralǵan. Tuıaq serippeı uıyqtapty. Eki keshtiń arasynda eki klastasy keldi. Júristeri sýyt, júzderi sýyq edi. «Gúlmırany Noqaı alyp qashyp, qaladaǵy apaıynyń úıine túsiripti. Sol kúni óziń kelmeı qaldyń. Keshten keıin jalǵyz úıine ketip bara jatqanda «Moskvıchine» salyp ap, qalaǵa tartyp otyrypty. Kónbegen soń, jolda qol jumsapty. Keshe aǵa-jeńgesi qýyp baryp keldi. Shymyldyq ishinde jylap otyr eken. Bekem bol!»

Qanshama ǵasyr samarqaý tartyp, uıyqtap jatatyn janartaý atylǵanda...

Qol ustasyp, armanǵa attanbaq sapar kenet úzilgende...

Aspandy qara bult qaptar edi. Qap-qara bulttar sheke túıistirgende aspan titirep, qara jer aýnaı ketip, túpsiz túnekke qulap bara jatqandaı alapat bolar edi. Nóser seldetip, Nuq paıǵambar keme soǵyp, tiri qalǵan topannyń elesi keler edi qaıyra jer betine.

Júrek kenet toqtap, kidi kidirisi keler sát tolassyz dúmpýge aınalyp, tósti jararman bop atylar edi.

«Gúlmıra joq! Bolǵan, endi joq!» Aqyn ataýly taǵdyrdan taıaq jeýge jaralǵan halyq. Ásirese, Noqaı syndy noıystardan Nuq paıǵambar zamanynan beri, jer betinde alǵash Óleń degen mahabbat kemesi jasalǵannan beri taıaq jep keledi. Aqyn balanyń júregi alǵashqy dúmpýde-aq atylyp, aınala bulaq basy teń alapty kómkerip ketken. Zarly, zárli jyrymen. Keıin janartaý damyl tabar, júrek te berish jamar. Ýaqyt bárine emshi...

Sodan beri otyz úsh jyl ótipti...

Sol Gúlmıra keshe telefon soqty. Almatynyń tórindegi aımaǵyna tanymal aqynnyń qyzmet keńsesine. Kúndelikti qarbalas, qym-qýyt jumys, sabylys, kirgen-shyqqan qaǵazdar, shyldyrlaǵan telefondar. Biraq, osy telefon erekshe shyryldaǵan tárizdi. Jaılaýdaǵy qulynshaqtyń daýsyndaı shyńǵyr-shyldyr kisineı shyqty. «Alo!» dedi bul qońyr daýysyna aýyr yrǵaqty mańyz bere. «Alo! Sálemetsiz be? Maǵan Bálenshe Túgenbaevıch kerek edi.» «Sálemetpiz. Men sizdi tyńdap turmyn». «...» «Alo! Aıta berińiz. Tyńdap turmyn...» Daýysyn sál jumsartqan. Jeliniń arǵy basyndaǵy daýystyń yrǵaǵy dirilge ulasqandaı boldy: «A-a. Sálemetsiz be? Men... Meni Siz tanymassyz... Jo-joq, umytyp qalǵan shyǵarsyz. Men Sizdi ylǵı kórip, to est óleńderińizdi ylǵı gazetterden oqyp, teledıdardan...» «Rahmet. Kim bolasyz?» «Men... Múmkin Sizdiń oıyńyzda bar shyǵarmyn. Men – Gúlmıramyn ǵoı...» «Gúlmıra?!. ...» «Iá, Gúlmıra. Baıaǵydaǵy, aýyldaǵy...» Qaıdan umytsyn! Otyz úsh jyl túsine kirip, oıynan ketpegen. Áredik, jylysqan jyldardyń jalynda ketken jastyǵyn eske alǵanda, Gúlmıra mingen qula taıdyń tastaqqa túsken tuıaq izin de ańǵaryp otyrar edi ǵoı. Birer sekýndta kúlli ómiri kóz aldynan zý-ý etip ótip, mıyna shanshylǵan. Keıde, Táńirdiń beımálim ámirimen uıqydaǵy janartaý bir búlk etip, qatpar-qatpar jynysty jaqpar arasyndaǵy bolmashy syzattardan bozamyq bult tústi bý atatyn. Oıanaıyn degeni me? Zerthanalardaǵy seısmoqurylǵylardyń shkalasy sekirip-sekirip ketetin. Munyń qoly dirildep, telefondy oń qulaǵyna aýystyrdy. «Alo! Oı, Gúlmıra! Halyńyz qalaı? Qaıdan telefon shalyp tursyz?» degen sóz boldy alǵash aýzyna túskeni. «Osynda kelgem. Bir sharýalarmen. Kishi qyz aýrýhanaǵa túsip qalyp, sonyń jaıymen...» «Aýylda dáriger bolmady ma?» dedi de, tilin tistep aldy. «Jo-joq...» jeliniń arǵy jaǵyndaǵy ún de abyrjyńqy shyqty. «Prosto... aýyldaǵy dárigerlerdiń shamasy kelmeı tur» «Nendeı kómek kerek? Qaı jerde jatyr?» Jasynan elgezek basy jarty ǵasyrǵa jýyq jyrlap kele jatqan armany aldyna kep turǵanda óz jany tarazyǵa tartylǵandaı tyzaqtap ketken. Aqyry, Gúlmıranyń bar sharýasyn oraılastyrǵan. Telefon arqyly. Endi ózi búgin poıyzǵa minbekshi. «Barsam ba, barmasam ba? Kórsem be, kórmesem be?» Osy saýaldy myń qaıtalady. Osyndaǵy aqyndardyń alǵashqy mahabbattaryn araǵa jyldar salyp keziktirgeni esine túsedi. Aýyldaǵy áriptes aǵasynyń «Idealy ólgen kún» týraly áńgimesi oıyna oralady. «On bestegi qulynshaq edik. Qazir qyryq segizdemiz. Adam qyzyǵatyn kórik qaldy ma bizde?» Kórikteı keýdesi kóterilip-basylyp, keń sabadaı tolysqan tulǵasyna aınadan kóz tastady. Buǵaq salbyrańqy. Júzine shalbar ájim túsipti. Qas-qabaǵy buırat qumǵa bitken buıyǵy baıalyshtaı – oıqy-toıqy. «Joq. Bolmas! On bestegi qalpymyzda qalaıyq...» Jyldar boıy tynshyǵan janartaý bir zamanda taý tóbesine kóterilgen áldebir geolog nemese álpınısiń jaqparǵa qaqqan shapqy temirinen de oıanyp keter edi. Áýeli jerdiń tinin titiretip gýil júgiretin. Munyń keýdesi de keshegi telefon shyldyrynan keıin ózgeshe kúrsiniske tolǵan. Tún balasy dóńbekship shyqty. Tańnan beri jumysy júrmedi. Aqyry, júrgizýshisin shaqyryp alyp, jumsaǵan. «Jyldam bar. Mine, telefony. Bar keregin áper. Ortalyq dúkennen syı-sıapat al. Poıyzǵa mingizip salǵan soń birden osynda kel. Habaryn aıt. Alys aýyldan kelgen týys edi». Endi sol shopyryn kútip, taǵat tappaı otyr. Aqyry keldi-aý. Ózi sekildi aýylda týǵan momyn, tyndyrymdy, jaýapty jigit. Ony-muny suraǵyshtap otyr. Ol esep berip, bul saýal tastap, biraz otyrǵan. Hatshy qyz esikten syǵalaǵyshtap qoıady, qabyldaý bólmesine biraz el jıylyp qalǵan syńaıly. «Mynaý dúkennen qalǵan aqsha edi». Júrgizýshisi 100 dollarlyq jasyl qaǵazdardy ústelge qoıa bergen. Bul shydamady aqyry «Óńi qalaı eken? Júdemep pe?» dedi. «Oı, aǵa! Mundaı kelbetti, kelisti áıel balasyn áli kórmeppin. Sizdi qaıta-qaıta surady: «Nege kelmedi?» dep» dedi shopyr jigit. «Apyraı, á! Ana aqshany óziń ala ber. Bir kádeńe jaratarsyń...» degen tolqyp ketken bul. «O, Gúlmıra! Sol qalpyńda bolmasań da, áli kerim ekensiń-aý! Meniń kelmegenimdi nege jorydy eken? «Mensinbedi» dedi me eken?»

Otyz úsh jyl. Arqanyń jazyǵynda janyma ergen quralaıdyń laǵyndaı janym edi, Gúlmıra!

Ańǵal edik. Pák edik. Al, ómir... Ómir – noqaı eken, noıys eken. Áý basta baǵyt alyp shyqqan jolyńnyń ortasynan asqan soń, keri qaıyrylyp qarasań...

Jer jaralyp, sý aqqan alǵashqy dáýirdi, muqym jalǵannyń jaratylysyn túsindirgisi keletin ǵalymdar Jer sharynyń jazıraly jumaqtary qaınarynda máńgi laýlap jatatyn qyzýy bar janartaýlardyń demimen jasanyp-jaranyp tura beredi deıdi. Al bir kúni atylsa...

Bizdiń jastyq shaǵymyz da sol jazıraly jumaq eken. Tek, óz degenin jasaıtyn májnún ómir bolmasa...

Sol kezdegi bala aqynnyń jazǵan óleńi qalaı edi? Ol támsildiń endigi nusqasy jazylsa bylaı bolýy tıis:

«Kóktem kózdiń jasyndaı bop syrǵı ma?
Syrǵı-syrǵı bet túzedik yldıǵa.
Sary belden saǵym ushyp jatqanda,
Janyma ergen janym ediń, Gúlmıra.
Kúndeı kúlgen kógimdegi Gúlmıra,
Usynady ómir neni Gúlmıra.
On besinde tolǵan aıdaı tolysqan,
Otyz úsh jyl kórinbedi Gúlmıra.
Jaquttaısyń,
Laǵyldaısyń, Gúlmıra,
Túngi uıqymdy taǵy urlaısyń, Gúlmıra.
Saǵynasyń...
Saǵynbaısyń, Gúlmıra.
Jańarqanyń jazyǵynan joǵalǵan –
Aqbókenniń laǵyndaısyń, Gúlmıra.
İsim ónbeı,
İshim ólgen, Gúlmıra,
Túsinbesti túsiner me eń, Gúlmıra.
Dertiń meńdep...
İship ólgem, Gúlmıra,
Otyz úsh jyr arnasam da umtylmaı,
Otyz úsh jyl túsime engen Gúlmıra.
Kóktem kózdiń jasyndaı bop syrǵı ma,
Syrǵı-syrǵı bet túzedik yldıǵa.
Ótken-ótti...
Qurysyn bári, Gúlmıra,
Esińe alyp júresiń be áli, Gúlmıra,
Aı alqaly, Kún syrǵaly Gúlmıra».
Aqyn men arý kelinshek áli kezdespegen desedi. Kezdesýi kerek pe, álde?..

19.01.2009.

---