InfoHub Logo

Zaman ózgergen saıyn  zaman talabyna saı qoǵamnyń barlyq salasy ózgeristerge ushyrap, jańaryp, damyp, jetilip otyrady. Sol sekildi elimizdiń bilim berý salasyna da sońǵy jyldary kóptegen ózgerister enip jatyr. Solardyń bastysy — «Tıimdi oqytý jáne oqý» baǵdarlamasy. Zaman kóshinen qalmaıyn, zaman talabyna saı bilimdi de, bilikti ustaz bolaıyn degen maqsatpen men de osy baǵdarlamany oqytý kýrsyna kelgen edim.

Osy baǵdarlamany oqı kele túıgenim: bul — oqýshylardy zertteı, zerdeleı kele, bar ynta-jigerimen jumys isteıtin, oqýshylaryna qamqorlyq kórsete otyryp, «óziniń bilimdiligimen, júris-turysymen, jaıdary minezimen ... oqýshysyna jaqsy maǵynada qatty áser etetin» (M.Ǵabdýllın) jáne oqýshylaryna  baǵdar beretin muǵalimderdi, oqytýdyń maqsattary men mindetterin jete túsine alatyn jáne soǵan jetýde ustanymy durys qalyptasqan muǵalimderdi, «jaı muǵalim habarlaıdy, jaqsy muǵalim túsindiredi, keremet muǵalim kórsetedi, Uly muǵalim shabyttandyrady»-degendeı (Ýılám Ýord aǵylshyn aǵartýshysy), oqýshylardy oqýǵa shabyttandyratyn muǵalimderdi, bastapqy ıdeıalardan týyndaǵan ıdeıalardy jetildire baılanystyra alatyn, sol ıdeıalardy oqýshylar ózderi qurastyra alýlary úshin túrtki bolyp, jaǵdaı jasaıtyn, sol ıdeıalardy jınaqtap, tolyqtyryp, tereńdetip bere alatyn  muǵalimderdi daıyndaıtyn Baǵdarlama.

Osy baǵdarlamada qarastyrylǵan jeti modýldiń barlyǵy da mańyzdy jáne qajetti  dep oılaımyn. Sebebi, bul — pedagog, psıholog  ǵalymdardyń neshe jylǵy zertteý eńbekteriniń nátıjesinde dúnıege kelgen úlken baǵdarlama. Bir sabaqtyń ózinde birneshe modýldi  qatar paıdalanýǵa bolady. Bir modýldiń ishinde birneshe ádis-tásilderdi tıimdi qoldanýǵa bolady. Bul degen keremet qoı! Ár sabaǵyń bir-birine uqsamaıtyn san qyrly, oqýshylarǵa tek bilim berip qana qoımaı,  alǵan bilimderin ómirde de qoldanýǵa úıretetin, aldyńnan ótken árbir shákirtińniń syn turǵysynan oılaýyn qalyptastyryp, damytatyn, jeke tulǵa bolyp qalyptasýyna úlken múmkindikter beretin, soǵan jaǵdaı jasaıtyn sabaq bolsa, oqýshylaryń pánińdi qyzyǵýshylyqpen oqıtyn bolsa, árbir sabaqqa qoıylǵan maqsatyńa jetip otyrsań, muǵalim úshin budan asqan baqyt bar ma? Osyndaı baqytqa jetkizetin tıimdi jol — osy baǵdarlama dep senimmen aıta alamyn.

 Men osy kýrstan ózimniń is-tájirıbeme qajetti kóp nárseni, jalpy pándi oqytýǵa jáne ár sabaqqa arnap durys maqsat qoıýdy úırendim. Tabys krıterıılerin durys qurýdy úırenip, onyń sabaq maqsatyna jetýde, baǵalaýda óte mańyzdy ekenin, ár sabaqtan keıin muǵalimniń óz jumysyna refleksıa jasap otyrýy  onyń alǵa jyljýyna kómektesetinin  uǵyndym.

Buryn da áriptesterimnen kórgen osy ádis-tásilderdi sabaqtarymda qoldanatynmyn. Qazir paıymdasam, ol kezde olardyń mán-maǵynasyn, maqsatyn asa túsinbegen ekenmin. Al búgingi kúni osy kýrstaǵy tálimgerim Rysbekova Álıa Aıtbaıqyzynyń arqasynda kóp nárseni túsindim, úırendim. Sol úshin jas ta bolsa, ustazdarǵa — ustaz bolyp júrgen ol kisige aıtar alǵysym sheksiz. Endi aldaǵy ýaqytta osy alǵan bilimimdi ózimniń is-tájirıbeme qoldanyp, joǵaryda atalǵan baqytty muǵalimderdiń qataryna qosylamyn dep úmittenemin. Ol úshin tek  erinbeı  eńbektený  kerek.

Sonymen qatar,  osy toptaǵy kýrstastaryma da kóp raqmet aıtamyn. Kýrsqa kelgen alǵashqy kúnnen bastap-aq bizde birden dostyq atmosfera qalyptasty. Sondaı atmosferany qalyptastyryp, soǵan jaǵdaı jasaǵan taǵy da sol tálimgerimiz — Álıa Aıtbaıqyzyna aıtar alǵysymyz sheksiz! Áriptesterdiń arasynda aýzyn ashsa, júregi kórinetin aqjarqyndary da, kómek qolyn sozyp, kez kelgenimizge qoldaý kórsetip júretinderi de,  júrgen jeri toı-dýman jandar da, barlyq jaqsylyqtyń  uıytqysy bolyp júretinder de, kóp úndemese de, óz isine tıanaqty, berilgen tapsyrmalardy ýaqytynda tap-tuınaqtaı oryndap júretinder de, ózindik ushqyr oı-pikirlerimen erekshelenetinder de, aqyndar da, bıshiler de, ánshiler de, sýretshiler de, san qyrly adamdar bar. Ár qaısysy bir-bir álem! Osynsha álemdi bir jerge toǵystyryp,  barlyǵymyzdy bir maqsat, bir múddege jumyldyrǵan — osy kýrs. Osyndaı kýrs uıymdastyryp, muǵalimderge barlyq jaǵdaıdy jasap júrgen Pedagogıkalyq sheberlik ortalyǵynyń basshylyǵyna, ujymyna kóp-kóp raqmet aıtamyn! Árqashan tek jaqsylyqtyń jarshysy bolyp júre berińizder!

Mańǵystaý oblysy Qaraqıa aýdany

Munaıshy selosy  №5 orta mektebiniń

aǵylshyn tili páni muǵalimi

Shýgýrova Janyl Ongalıevna

---