InfoHub Logo

Алматыдағы Аль-Фараби даңғылында болған өліммен аяқталған жол-көлік оқиғасы бойынша тергеу аяқталуға жақын. Бұл туралы Ішкі істер министрінің орынбасары Санжар Әділов мәлімдеді.

Бұл туралы Infohub.kz ақпарат агенттігі хабарлайды.

Оның айтуынша, қылмыстық іс бойынша қажетті сараптамалардың барлығы дерлік алынған. Ішкі істер министрлігінің басшысы тергеудің соңғы кезеңде екенін және жақын екі аптада істің аяқталатынын айтты.

Трагедияның хронологиясы

21 наурызға қараған түні Аль-Фараби даңғылы мен Мендіқұлов көшесінің қиылысында Zeekr автокөлігі қарсы жолаққа шығып, Mercedes-ті соқтығыстырған. Апат салдарынан 29 жастағы жүргізуші мен Mercedes-тің 20 және 22 жастағы екі жолаушысы оқиға орнында көз жұмды. Zeekr көлігінің жүргізушісі аман қалып, ауруханаға жатқызылды. Кейіннен оның жеңіл дәрежедегі алкогольдік масаң күйде болғаны анықталды.

Полиция қызметкерінің қатысы бар ма?

Әлеуметтік желіде апатқа жол бойындағы жарыс себеп болған деген нұсқалар пайда болды. Кейбір ақпараттарда жарысқа жоғары лауазымды полиция қызметкерінің қатысы бар деген болжам айтылды. Осыған байланысты бірқатар полиция басшылары қызметінен босатылды.

Ішкі істер министрлігінің мәліметінше, қылмыстық іс бойынша кінәлі деп танылған жүргізушіге қатысты қылмыстық іс қозғалды. Ол қазір тергеу изоляторында жазасын күтіп отыр. Министрлік медиада тараған ақпараттарды да егжей-тегжейлі тексеретінін хабарлады.