InfoHub Logo

Алматы қаласындағы Шарипов көшесінде үлкен ағаш құлап, жолдың үстіне тұрған автокөлікті басып қалды. Оқиға салдарынан Honda Civic маркалы көліктің шатыры қисайып қалған. Бақытымызға орай, бұл жағдайдан ешкім зардап шеккен жоқ.

Бұл туралы Infohub.kz ақпарат агенттігі хабарлайды.

Куәгерлердің айтуынша, оқиға сенбі күні болған. Түсірілген суреттерден ағаштың көліктің үстіне қалай құлағаны анық көрінеді.

Ағаштың құлау себебі

Алматы қаласы әкімдігінің мәліметінше, құлаған ағашта сырттай қарағанда ешқандай апаттық белгілер болмаған. Алайда, соңғы кездегі жауын-шашын салдарынан топырақ суланып, жұмсарып кеткен. Бұл ағаштың тұрақсыздығын арттырып, әлсіреген тамыр жүйесі салмақты тәжді көтере алмай, ағаштың құлауына себеп болған.

Әкімдік ағаштың кесіліп, шығарылғанын және көлік қозғалысының қалпына келтірілгенін хабарлады. Зақымдалған көлік иесіне келтірілген шығын өтелетіні немесе өтелмейтіні туралы ақпарат әзірге нақтыланбады.