InfoHub Logo

1959 жылы Ақмола қаласында (бүгінгі Астана) жастар фестивалі кезінде болған трагедиялық оқиғаның мән-жайы 70 жылдан кейін толық анықталды. Сол кездегі ағаш көпірдің опырылуы салдарынан алғашқыда жүздеген адам қаза тапты деген қауесет тарағанымен, нақты деректер бойынша алты адам көз жұмған.

Бұл туралы Infohub.kz ақпарат агенттігі хабарлайды.

Апаттың себебі мен салдары

Оқиға 1959 жылы 14 маусымда облыстық жастар фестивалі өтіп жатқан кезде болды. Есіл (сол кездегі Ишим) өзені арқылы өтетін тар ағаш көпірге адамдар тым көп жиналғандықтан, көпірдің қоршаулары сынып, ондаған адам суға құлаған. Куәгерлердің айтуынша, сол сәтте дүрбелең мен айқай-шу болып, адамдар бір-бірін құтқаруға тырысқан.

Апат туралы ақпарат сол кезде жарияланбаған, кеңес билігі оны құпия ұстаған. Бұл жағдай жүздеген адам қаза тапты деген сияқты қауесеттердің тарауына себеп болған.

Анықталған жаңа деректер

Трагедияның нақты күні мен қаза тапқандар санын анықтауға көмектескен негізгі дерек көздері – апат кезінде зардап шеккен Муршида Мустаеваның отбасылық жазбалары мен Ресей архивтерінен табылған құжаттар болды. Муршида Мустаева апат кезінде тоғыз айлық жүкті болған және сол түнде ұл босанған. Ұлы Анвардың туған күні 1959 жылғы 15 маусым екені, демек апат 14 маусымда болғаны нақтыланды.

Ресей мемлекеттік жаңа тарих архивінен табылған құжаттарға сәйкес, апат салдарынан алты адам қаза тапқан: екі ересек және төрт бала. Тағы он адам ауруханаға жатқызылған. Тергеу барысында адамдар ағынын реттеу шараларының болмағаны анықталып, қалалық қызметтер мен теміржол басшылары жауапқа тартылған.

Апаттың салдарынан салынған көпір

Бұл трагедиядан кейін Астанада әлі күнге дейін қолданылып жүрген бетонды жаяу жүргіншілер көпірінің құрылысы басталды. Бұрынғы ағаш көпір жыл сайын көктемде еріген қар суымен бұзылып, қайта салынып отырған. 1959 жылғы оқиғадан кейін ғана қала билігі тұрақты көпір салу қажеттілігін түсінген. Жаңа бетон көпір 1963 жылы пайдалануға берілді.