InfoHub Logo

Ақтау қаласының жағалауы заманауи үлгіде қайта жаңғыртылмақ. Бұл жоба өңірдің туристік тартымдылығын арттырып, қала тұрғындары мен қонақтарына жайлы демалыс аймағын сыйлайды.

Бұл туралы Infohub.kz ақпарат агенттігі хабарлайды.

Жағалаудың жаңа келбеті

Жоба аясында жалпы ұзындығы шамамен 4,5 шақырым болатын жағалау бойында серуендеу аймақтары, велосипед және жүгіру жолдары, бақылау алаңдары, субұрқақтар, скейт-парк, балалар мен спорт алаңдары, демалыс аймақтары, фудкорттар мен қызмет көрсету павильондары бой көтереді. Сондай-ақ, пирстер, жабдықталған жағажай аймақтары мен балалар бассейндерінің құрылысы да жоспарланған.

Экологияға басымдық

Құрылыс барысында Каспий теңізінің жағалау экосистемасын сақтауға бағытталған заманауи инженерлік шешімдер қолданылады. Оларға күн энергиясымен жұмыс істейтін сыртқы жарықтандыру жүйелері, сәулеттік жарықтандыру, сумен жабдықтау және су бұру желілері, сондай-ақ аумақты кеңінен көгалдандыру жұмыстары кіреді.

Ұлттық нақыш пен сапа

Облыс әкімі Нұрдәулет Қилыбай жағалаудың сәулеттік келбеті өңірдің тарихи-мәдени ерекшеліктерін айқын көрсетуі керектігін атап өтті. «Өңірдің ерекше рухын сезіну үшін жобада ұлттық сипат, дәстүрлі ою-өрнектер мен жергілікті ерекшеліктер көрініс табуы маңызды. Бұл бағытта ақсақалдармен және қоғам өкілдерімен кеңесу қажет. Сонымен қатар, пирс маңында жұмыс істейтін яхташылар үшін жайлы жағдай жасалуы тиіс. Бірінші кезеңнің құрылысын тездетіп, ең бастысы, жұмыстың сапасына ерекше назар аудару қажет», - деді әкім.

Жобаны жүзеге асыру 2026 жылдың сәуір айында басталды және 2029 жылдың қаңтарында аяқталуы жоспарлануда. Бұл жаңашыл жоба Ақтауда халықаралық деңгейдегі заманауи жағалауды қалыптастырып, өңірдің туристік әлеуетін арттырады деп күтілуде.