InfoHub Logo

Премьер-министр Олжас Бектенов Ақмола облысына жұмыс сапары барысында су тасқынына қарсы дайындық мәселелерін талқылады. Мемлекеттік органдар басшылары мен бірқатар облыс әкімдерінің қатысуымен өткен жедел штаб отырысында Президент тапсырмалары аясында тіршілікті қамтамасыз ету нысандарының жұмысы, алдын алу және жедел әрекет ету шаралары қаралды.

Бұл туралы Infohub.kz ақпарат агенттігі хабарлайды.

Өзен арналары кеңейтіліп, жағалаулар нығайтылды

Олжас Бектенов Көкшетаудағы Қылшақты өзенін тереңдетіп, арнасын кеңейту жұмыстарымен танысты. 2024 жылғы тасқыннан кейін «ҚазЦинк» компаниясының қолдауымен жағалауды бекітіп, каналдың өткізу қабілеті секундына 136 текше метрге дейін арттырылған. Шағалалы өзенінде де осындай жұмыстар жүргізіліп, 2025 жылғы көктемгі кезеңде бұл шаралардың тиімділігі байқалды.

Ақмола облысында биыл су тасқынына қарсы шаралар 163 елді мекен мен 32 жол учаскесін қамтыды. Ұзындығы 56 шақырым болатын бес өзен арнасы тазартылып, тереңдетілді, 17 гидротехникалық құрылыс қалпына келтіріліп, күшейтілді.

Қауіпті факторлар мен әкімдерге қойылған талап

Премьер-министр жағдайды ушықтыруы мүмкін факторларға тоқталды: қалың қар, күзгі жауыннан кейінгі жердің қатып қалуы, топырақ қабатындағы терең тоң. Кейбір өңірлерде дайындық толық аяқталмағаны, өзен арналарын тереңдету мен жағалауды бекіту жұмыстарының созылып кеткені, елді мекендерден қар шығарудың жеткіліксіздігі сынға алынды.

Олжас Бектенов әкімдерге «кез келген сценарийге дайын болуды» тапсырып, бір апта ішінде тәуекелі жоғары елді мекендерді аралап, нақты шара қабылдауды міндеттеді.

Министрлердің баяндамалары мен болжамдар

2026 жылғы су тасқыны кезеңіне дайындық жөнінде Экология, Су ресурстары және ТЖ министрлері баяндама жасады. Ақмола, Қарағанды, Солтүстік Қазақстан облыстарында су басу қаупі сақталып отырғаны айтылды.

Қазгидрометтің болжамы бойынша, наурыз және сәуір айларында орташа температура нормадан жоғары, ал жауын-шашын көп болады деп күтіледі. Су басу қаупі Ақмола, Қарағанды, Солтүстік Қазақстаннан бөлек, Шығыс Қазақстан, Абай, Қостанай, Батыс Қазақстан, Ақтөбе, Павлодар, Түркістан, Алматы, Ұлытау және Жетісу облыстарында да бар. Тәуекелі төмен өңірлер де аталды.

ТЖМ-нің дайындығы мен қауіпсіздік шаралары

Төтенше жағдайлар министрлігінің жедел штабы 1 наурыздан бастап тәулік бойы мониторинг жүргізіп отыр. Ел бойынша су басу қаупі бар 1242 елді мекен анықталған. 39 мыңнан астам адам, 18 мыңнан астам техника мен арнайы құрал дайын тұр. Өткен жылы 842 бірлік арнайы техника, 27 қайық, 4 ұшақ және басқа да жабдықтар алынған. Сондай-ақ 830 шақырымнан астам қорғаныс бөгеттері салынды, 1128 шақырым дренаж жүйелері мен каналдар жөнделді.

Премьер-министр Щучинск пен Семейдегі оқиғаларды ескеріп, алдын алу шараларын күшейтуді тапсырды. ТЖ министрі Семейдегі өрттің тез тоқтатылғанын, ал Щучинскідегі жарылыстың себебі тұрмыстық газ баллондарын пайдалану ережесінің бұзылуымен байланысты екенін хабарлады. Өрт қауіпсіздігін күшейту, рейдтер мен түсіндіру жұмыстарын жандандыру тапсырылды.

Жаңа технологиялар мен инфрақұрылым

«Бірыңғай дрондар инфрақұрылымы» жобасы таныстырылды. Дрондар су деңгейін, қорғаныс нысандарының жай-күйін бақылап, ақпаратты жедел штабтарға жеткізуге мүмкіндік береді. Бұл жүйе Ақмола облысының аудан орталықтары мен қалаларында енгізілген. Дрондар арқылы ТКШ қауіпсіздігі, санитарлық ахуал, ауыл шаруашылығы алқаптары бақыланып, өрт, заңсыз қоқыс полигондары сияқты тәуекелдерді ертерек анықтауға сеп болады.