InfoHub Logo

Иранда 19 жастағы жас балуан Салех Мохаммади өлім жазасына кесілді. Бұл туралы Infohub.kz ақпарат агенттігі хабарлайды.

Мохаммади Иранның жасөспірімдер құрамасының мүшесі болған және болашағынан зор үміт күттірген спортшылардың бірі саналды. Жаза Құм қаласында дарға асу арқылы орындалды. Онымен бірге тағы екі адам да өлім жазасына кесілді. Билік оларды 2026 жылдың қаңтарында болған жаппай наразылықтар кезінде екі полиция қызметкерін өлтірді және Израиль мен АҚШ мүддесіне қызмет етті деп айыптаған.

Спортшының ісі қалай қаралды?

Салех Мохаммади 2024 жылы Ресейде өткен турнирде қола жүлдегер атанғаннан кейін ұлттық құрамаға шақырту алған. Алайда, оның ісі өте қысқа мерзімде қаралды: 15 қаңтарда ұсталып, 4 ақпанда үкім шығарылған. Құқық қорғау ұйымдарының мәліметінше, спортшы өз кінәсін мойындамаған, азапталғанын айтып, тәуелсіз адвокат көмегін ала алмаған.

Биліктің қатаң ескертуі

Қазіргі таңда Иранда жалғасып жатқан наразылықтар аясында ондаған спортшы мен жаттықтырушы қамауда отыр. Сарапшылар бұл жағдайды биліктің қоғамға жасаған қатаң ескертуі ретінде бағалайды. Яғни, наразылықтарға қатысқан кез келген адам, тіпті танымал спортшылар да, қатаң жазаға тартылуы мүмкін екенін көрсетеді.