InfoHub Logo

Жаңа жыл кешінде өтетін мереке.

Жасыл шырша жанында балалар мен Аяз ата.

Шымылдық ашылады.

Аяз ата.
Уа, балалар, барлығың
Тәртіптісің, білемін.
Орындалар дәл бүгін,
Не тілесең – тілегің.
Орындалар бүгінгі
Алға қойған мақсат та.
Қояйық біз күлуді,
Артық кетіп жатсақ та.
Өз мақсатын, арманын,
Айтар екен кім қане?
Құлағың сал, ал бәрің,
Тыныш тұрып тыңдалық.

1-бала.
Ертеңім деп бізден ел
Күтіп отыр көп үміт.
Білім қуып, ізденер
Шағымыз ғой соны ұғып.

2-бала.
Ауызды ашып,
Қоймайық
Басқа жұрттан соң қап біз.
Осы бастан ойлайық,
Қайсымыз кім болмақпыз?

1-бала.
Біз жасырмай айтайық,
Сіз де айтыңыз шындықты.
Болмақ екен
Байқайық
Кім құрметті, кім мықты?

Аяз ата
Ұсынысың орынды,
Сөз бастауға мақұл кім?
Қысылмай-ақ қолыңды
Көтере бер батылың.

(Бір бала қол көтереді.)

Аяз ата.
Ер екенсің! Жарадың!
Ал айта ғой, қарағым.

2-бала.
Бизнесмен болып мен,
Байып алу – тілегім.
Жүрмеймін жай көлікпен,
Иномарка мінемін.
Біреулердей,
Байысам,
Зып бермеймін шетелге.
Өндіріске ауысам,
Туған елден кетем бе?

3-бала (бизнесмен балаға қарап). 
Жүру үшін шіреніп,
Мен банкир боп аламын.
Саған беріп кредит,
Күреп ақша табамын.
Бабалардың әмбеге
Қастерлетем суретін.
Барша жұрттың
Теңгеге
Арттырамын құрметін.

4-бала.
Мен бірінші нөмірлі
Елші болам. Мынандай!
(Бас бармағын шошайтады.)
Өзге елдерге
Елімді
Сыйлатамын Құдайдай.
Оқып жүрмін сол үшін
Екі бірдей шет тілін.
Кеңейіп ой-өрісім,
Келеді үдеп екпінім.

5-бала.
Жетпей тағам санына
Тұрсын дүкен, асханаң.
Сол үшін мен
Шаруа
Қожалығын басқарам.
Қарық қылып,
Бәріңнің
Берекеңді арттырам.
Отбасынан әр үйдің
Үзілмейді шаттық ән.

6-бала.
Пір тұтатын асылдар
Мен тарихшы боламын.
Заманалар ғасырлар
Қойнауларын шоламын.
Бағаламай бабаны
Дараламай дананы,
Сүймей Отан-Ананы,
Боламыз ба саналы?!
Көне заман көшінің
Көп іздері – ақтаңдақ.
Әр шұңғылы осының
Ниетім бар ақтармақ.

7-бала.
Ұяласың бір-біріңнен
Телевизор қойсаң тек.
Сондықтан да жүрмін мен
Режиссер болсам деп.
Ұлылардың бейнесін
Жасап шығам кинода.
Қара да тұр, көресің:
Шет қалмайды бір дана.

8-бала.
Тыңдай алман таңданбай
Нұрағаңның көп әнін.
Мен Нұрғиса ағамдай
Композитор боламын.
Нұрағаңдай
«Алтын жұлдыз» кеудеме тағамын.

9-бала.
Мен жұмыскер арадай
Барымды елге арнаймын.
Тоқтар, Талғат ағадай
Зеңгір көкке самғаймын.

10-бала.
Менің де бар мақсатым,
Болса да көп басқа өнер.
Болсам деймін жақсы ақын,
Жазушы не баспагер.
Айтарлықтай айт десе
Кітаптарды қаптатам.
Дүкендерде әйтпесе
Кітап деген жоққа тән.

11-бала.
Абыздардан бата алған,
Тілеген биік самғауын.
Дәл Нұрсұлтан атамнан
Аумай қалу – арманым.
Ақтаймын ел сенімін,
Бейбітшілік сақтаймын.
Бақыты үшін елімнің
Бір сәт тыным таппаймын.
Емеспін мен жай бала,
Жиырма бес жыл мұрсат бер.
Елбасы етіп сайла да,
Содан кейін жұмсап көр...

12-бала.
Президент те, балалар,
Мұғалімнен оқыған.
Дәріс алар даналар,
Мен ұстаз боп отырам.

Аяз ата.
Сезіп отыр кім мықты –
Балалардың өздері.
Қандай жақсы
Шындықты
Айтқызбай-ақ сезгені.
Жақсы азамат бол бәрің,
Мейірі мол Жаратқанның.
Арман, тілек, ойларың,
Орындалсын, қарақтарым.

---