InfoHub Logo

Неліктен маған және менің мектебіме өзгеріс қажет?

Бүгінгі білім жүйесі бүкіл әлем деңгейінде қоғамдық дамудың өлшемі мен сол қоғамның негізін құрайтын басты тетіктерінің бірі болып отырғаны баршамызға белгілі. Қарқынды өзгеріп жатқан әлемде білім саласындағы мұғалімдер үшін де ең басты, маңызды мәселе болып отырғаны: «ХХІ ғасырда нені оқыту керек?» және «Мұғалімдер оқушыларды ХХІ ғасырға қалай дайындайды?» [мұғалімге арналған нұсқаулық - 5 бет]. Сапалы білім және саналы тәрбие беру барысында оқушылардың шығармашылық қабілеттерін, ақыл - ой белсенділігін дамыту болып табылады. Себебі, білімді жастар ғана ел егемендігін баянды етіп, қоғамның әлеуметтік - экономикалық дамуына лайықты үлес қоса алады.
Алдымен әлемдік білім беру жүйесіндегі реформалау үдерістеріне тоқтала кетсек.

Қазіргі кезеңде елдердің бір - бірінен салыстырмалы тұрғыдағы артықшылығы, бәсекелестік күш - қуаты олардың табиғи ресурстарымен емес көбінесе адам капиталымен, инновациялық технологияларды және ақпарат ағымын ұтымды пайдаланумен анықталып отыр.
Білімі мен технологиясы жедел өрлеп, экономикалық және қоғамдық тұрақты даму жолына түскен Финляндия, Сингапур, Жапония сияқты елдердің тарихи тәжірибелері осының айқын дәлелі.

Финляндия елінің білім беру үлгісіндегі басты ерекшелік - білім берудің үздіксіз жүйесін қолдануында болса керек. Финляндияда ең бастысы балалардың мектепке дейінгі мекемелермен қамтылуына үлкен назар аударылған. Фин оқушыларының басым бөлігі, тіпті түгелге жуығы ең алғашқы оқу табалдырығын аттап, мектеп партасына жайғаспас бұрын алдымен, балабақшадағы дайындық тәрбиесімен сусындайды. Мектепке дейінгі дайындық білімімен ауыздандыру мәселесіне үлкен назар аударылатыны соншалықты, кей жағдайда осы төңіректе қоғамдық пікірталастар, проблемалар ашық, бұқаралық талқыға шығарылып отырады екен. «Баланы бесіктен» бастап біліммен емізу, білімге қарай икемді етіп, «бағып - қағу» дегеніңіз осы шығар.