InfoHub Logo

Қазақстанда алкогольді қатаң шектеу ұсынысы талқылануда. Мәжіліс депутаты Магеррам Магеррамовтың айтуынша, алкоголь қылмыстың негізгі себептерінің бірі болып табылады, ал мемлекет жыл сайын адам ресурстарынан айырылып отыр.

Бұл туралы Infohub.kz ақпарат агенттігі хабарлайды.

Алкоголь және қылмыс

Магеррамовтың мәліметінше, ауыр қылмыстардың басым бөлігі алкогольдік мас күйінде жасалады. Әрбір екінші кісі өлтіру, әрбір үшінші зорлау және бұзақылық әрекеттері мас күйінде орын алады. Сондай-ақ, әрбір төртінші тонау, жол-көлік оқиғалары және отбасылық зорлық-зомбылық құқық бұзушылықтарының жартысынан көбі алкогольдің әсерінен жасалады.

Сатылымды шектеу және бақылау

Депутат алкоголь сатылымын қатаң бақылау қажеттігін атап өтті. Ол алкоголь өнімдерін цифрлық таңбалауды енгізуді ұсынды, бұл заңсыз сатылымдарды бақылауға мүмкіндік береді. Сонымен қатар, алкогольді сауда нүктелерінің санын шектеу және балалар мекемелерінен 100 метр қашықтықта сатуға тыйым салуды қайтару ұсынылды.

Қазіргі уақытта Қазақстанның 429 ауылында алкогольден толық бас тартылған. Мысалы, Ақтөбе облысында 33 ауыл, Қызылорда облысында 18 елді мекен алкогольден бас тартты. Атырау облысының 53 ауылында да алкоголь сатылымы тоқтатылды, нәтижесінде екі жыл ішінде құқық бұзушылық тіркелмеген.