InfoHub Logo

Ақмола облысының Щучинск қаласындағы кафеде болған жарылыстан кейін қала билігі зардап шеккендер мен қаза тапқандардың отбасыларына жан-жақты қолдау көрсетуді бастады. Оқиғаның мән-жайын анықтау және қауіпсіздік шараларын күшейту жұмыстары жүргізілуде.

Бұл туралы Infohub.kz ақпарат агенттігі хабарлайды.

Жедел штаб отырысы

Облыс әкімі Марат Ахметжанов зардап шеккендер мен қаза тапқандардың отбасыларына жан-жақты көмек көрсетуді, медициналық көмекті уақтылы ұйымдастыруды және жедел жәрдем бригадаларының тәулік бойы кезекшілігін қамтамасыз етуді тапсырды. Сондай-ақ, оқиғаның себептерін объективті тергеп, кінәлілерді жауапқа тарту және қауіпсіздік талаптарының сақталуын күшейту міндеттелді.

«Азаматтардың қауіпсіздігі басты назарда болуы тиіс. Бұл бағытта қосымша ұйымдастырушылық және алдын алу шаралары қабылданады. Зардап шеккен отбасыларға толық қолдау көрсетеміз», - деді облыс әкімі.

Қаржылай және әлеуметтік көмек

Қазіргі таңда қаза тапқандардың 6 отбасы 2 миллион теңгеден біржолғы төлем алды. Кафе иесі де қаза тапқандардың отбасыларына тағы 2 миллион теңгеден төледі. Сондай-ақ, демеушілік қаражат есебінен 5 отбасының несиелері өтеліп, заңнамаға сәйкес әлеуметтік төлемдер тағайындалды.

Ведомствоаралық комиссия жұмысы

ҚР Төтенше жағдайлар министрлігінің басшылығымен аудан аумағында ведомствоаралық комиссия жұмысын жалғастыруда. Министр аудандық ауруханада ем алып жатқан науқастармен кездесіп, жағдайларымен танысты. Барлық науқастарға қажетті медициналық көмек толық көлемде көрсетіліп, жағдайлары дәрігерлердің бақылауында.

Оқиғаның мән-жайы

26 ақпанда Щучинск қаласында «Орталық плов» мейрамханасында газ-ауа қоспасының жарылысы болды. Оқиға салдарынан 28 адам зардап шегіп, 7 адам қаза тапты. Зардап шеккендер Бурабай аудандық ауруханасына және Көкшетау қалалық көпбейінді ауруханасына жеткізілді.