InfoHub Logo

Шымкентте 75 жастағы ер адамнан сібір жарасы (сибирская язва) анықталды. Алдын ала болжам бойынша, науқас нарықтан сатып алған ет өнімдерінен жұқтыруы мүмкін.

Бұл туралы Infohub.kz ақпарат агенттігі хабарлайды.

Індеттің таралу жолдары анықталуда

Кейіннен анықталғандай, ауруға шалдыққан науқасқа арналған етті фермерлердің бірі әкелген. Ол барлығы алты бас ірі қара мал сойып, оның етін қаланың сауда орындарына таратқан.

Алайда, мал иесі өзіне тиесілі бордақылау алаңын тексеруге мамандарды жібермей отырғаны айтылады.

Науқас ауруханаға жатқызылды

Мамандар қазір індеттің таралуының ықтимал жолдарын анықтауға кірісті. Науқас ауруханаға жатқызылып, дәрігерлердің бақылауында.

«Ауруханаға түскен сәттен бастап науқасқа толық кешенді тексеру жүргізілді. Қажетті зертханалық және аспаптық зерттеулер тағайындалды. Олардың нәтижелері бойынша инфекциялық ауру диагнозы расталды», - деп түсіндірді Шымкент қалалық денсаулық сақтау басқармасының баспасөз қызметі.

Емдеу хаттамаға сәйкес жүргізіліп жатқаны айтылды.