InfoHub Logo

Талғар қаласында полиция бөлімшесінің жанына көлігін заңсыз қойған майордың әрекеті жұрт назарына ілікті. Бұл жайтты куәгер видеоға түсіріп, әлеуметтік желіде жариялаған. Видео желіде тез тарап, көпшіліктің қызу талқылауына айналды. Кейіннен бұл жайтқа полицияның баспасөз қызметі жауап берді.

Бұл туралы Infohub.kz ақпарат агенттігі хабарлайды.

Не болды?

Видео авторы полиция бөлімшесі маңында бірнеше жол ережесінің бұзылғанын, соның ішінде көліктердің дұрыс тұрақталмағанын көрсетті. Кадрларда алдыңғы және бүйір терезелері қараңғыланған Mitsubishi көлігі көрінеді. Кейіннен көліктен қараңғылағыш пленка алынды.

Сонымен қатар, бірнеше жүргізуші «Тоқтауға тыйым салынады» белгісінің талаптарын бұзып, көліктерін тұраққа қойған. Видео авторы полиция майорына жақындап, оның аталған белгіге қарамастан, айналма жолға тым жақын көлігін қалдырғанын айтты.

Анықтама: Қазақстан Республикасы Жол жүрісі қағидаларының 12.4-тармағына сәйкес, жүргізушілерге қиылыстарда, сондай-ақ айналма жолдың шетінен 30 метр жақын жерде тоқтауға және тұраққа қоюға тыйым салынады.

Автор полиция қызметкерлерімен бірге бұрылыстан 30 метр қашықтықты өлшеп, сол аймақта тұрған көліктердің мемлекеттік нөмірлерін алды. Олардың арасында майордың көлігі де болды. Кадрларда майордың планшетке хаттама толтырып жатқаны көрінеді.

Полицияның жауабы

Алматы облыстық полиция департаментінің хабарлауынша, анықталған барлық фактілер бойынша шаралар қабылданды.

«Жол ережесін бұзған жүргізушілер заңда белгіленген тәртіппен жауапкершілікке тартылды», - деп хабарлады ведомство.

Ведомство мәліметінше, видеоға түскен және ереже бұзған барлық жүргізушілер жауапкершілікке тартылып, айыппұл салынған. Айыппұл сомалары нақтыланбады. Сондай-ақ, бұзушылармен алдын алу әңгімелері жүргізілді.