InfoHub Logo

Түркістан облысы Төле би ауданындағы Ақмешіт ауылының туристік аймағында қатты жауын салдарынан Ақмешіт өзенінің деңгейі көтеріліп, екі уақытша көпірді шайып кетті. Бұл туралы ҚР Төтенше жағдайлар министрлігінің баспасөз қызметі хабарлады.

Бұл туралы Infohub.kz ақпарат агенттігі хабарлайды.

Оқиға салдарынан демалыс және пикник аймақтарын байланыстырып тұрған екі уақытша көпір жойылды. Сондай-ақ, Екпінді ауылы маңындағы өткел де зақымдалды. Төтенше жағдайлар министрлігінің күштері оқиға орнына жетіп, Екпінді ауылынан 11 адамды (7 бала) қауіпсіз жерге жеткізді. Демалыс аймағынан 70 адам (20 бала) эвакуацияланды. Азаматтарға медициналық көмек қажет болмады, зардап шеккендер жоқ.

Оқиға орнында ТЖМ, «Қазселденқорғау» қызметкерлері, полиция және жергілікті атқарушы органдар жұмыстарын жалғастыруда.

Бұған дейін ауданның Қасқасу ауылдық округінде жолдың шайылуы салдарынан бес автокөлік су астында қалып, 15 адам құтқарылған болатын. Тау шаңғысы базасы маңында да бір көліктегі 10 адам (3 бала) құтқарылды.