InfoHub Logo

Шымкенттің орталығында 40 жастағы спортшы Василий Колесниковты ұрлап, бірнеше сағаттан кейін өлтіріп кеткен оқиға жұртшылықты дүр сілкіндірді. Бұл жай ғана жол апаты емес, адвокат Талғат Есімовтің айтуынша, мұқият жоспарланған шабуыл болуы мүмкін.

Бұл туралы Infohub.kz ақпарат агенттігі хабарлайды.

Алдын ала жоспарланған қастандық

20 қаңтар күні Шымкентте екі көлік соқтығысып, жүргізушілер арасында жанжал шықты. Кейін тағы бір көлік келіп, он шақты адам төбелеске араласты. Олардың арасында Василий Колесников та болды. Адвокаттың айтуынша, бұл қастандық спортшыға бағытталған. Оны аңдып, пышақпен шабуыл жасаған.

— Алғашында бұл жол апаты деп ойлаған едік, бірақ кейін бұл Колесниковқа жасалған қастандық екені анықталды. Шабуыл шамамен он минутқа созылды. Оны көлікке күштеп отырғызып, Түркістан облысының Ордабасы ауданына алып кетті, — деді адвокат.

90-жылдардағыдай жағдай

Есімов полицияның әрекетсіздігіне наразылық білдіріп, қалада қылмыскерлерді тоқтата алмағанын айтты.

— Шымкентте бақылау камералары орнатылған, бірақ олар қылмыскерлерді тоқтата алмады. Егер полиция дер кезінде әрекет етіп, негізгі қиылыстарды жапса, спортшының өмірін сақтап қалуға болар еді, — деді ол.

Қазір тергеу жалғасуда. Полиция қылмыстық іс қозғады. Жеті күдікті ұсталды, қалғандары іздестірілуде.