InfoHub Logo

Týǵan halqymyz ejelden meken etip, aıshylyq jerge at shaptyryp, birinen-biri habar úzbeı, bir shetine jaý tıse, ekinshi sheti jaıbaraqat jatpaı atqa qonǵan, qasıetti qazaq topyraǵynyń ár buryshy maǵan kıeli besikteı seziledi, Aldymen, aýyldy, aımaqty tanytatyn — sol topyraqtyń perzentteri, adamdar. Buryn aıaq baspaǵan jerge bara qalǵanda, aldyńnan jaqsy adamdar kezikse, keıinnen ol aımaqtyń búkil halqy, úlkeni men kishisi túgeldeı álgi jaqsy adamdardaı bolyp elesteıdi. Nemese kerisinshe.

Jezqazǵan óńiri — men úshin qasıetti de qasterli meken. Oǵan sebep bolǵan osy aımaqtyń ár núktesinde týyp-ósip, jany názik te, keń, dúnıetanymy, óresi men ónegesi bıik bolyp er jetken abzal jandar. Olar kóp. «Jezqazǵan» degen sózdi qulaǵym shalyp qalsa, men erekshe eljiregen sezim, iltıpatty yqylaspen sol adamdardy eske alamyn. Aman júrse eken dep tileımin. Eldiktiń, qazaqy bolmysty bıik adamgershiliktiń, kórgendiliktiń qasıetin sińirgen sondaı adamdar óz ornynda alasarmaı júrse, halqymyzdyń tirligi de abyroıy da jasaı beredi dep úmit etemin. Olar: Saǵadat Dúısebekov, Ábiljan Súleımenov, Bitimbaı Bekmaǵambetov, Qaıyrjan Mádıev sekildi azamattar, Kúlpash, Gúlbaný, Raqysh, Meńjamal, Sharıpa syndy qyz-kelinshekter.

Men Jezqazǵan aımaǵyndaǵy eldiń bári osy kisiler sekildi dep uǵamyn.

Meniń «Ulytaý qyzy» dep atalatyn maqalany jazýyma osy adamdar sebep boldy, «Ulytaýym» atty óleńniń týýy da sondyqtan edi.

Raqysh Náshkenqyzy laýazym jaǵynan alǵanda aýdandaǵy eń úlken ákim emes — aýdandyq keńes atqarý komıteti tóraǵasynyń orynbasary. Qazirgi zamanda eń qıyn jumys — orynbasardyn jumysy: árkim óz ýchastogindegi istiń bárin alańsyz sheshsin dep bılik berip qoıatyn basshy bul kúnde sırek. Ózimshe ton pishem dep basshylarǵa jaqpaı, jalańaıaq qalý da jıi kezdesip jatady. Ári halyqtyń muń-muqtajyn qanaǵattandyrar is tyndyryp, ári basshylardyń da kóńilinen shyǵyp otyrý ekiniń biriniń qolynan kele bermeıdi. Eki ottyń ortasynda kúıip-janbaı-aq, basshylardyń emeýrinin oryndap, ózdiginen bas qatyryp is tyndyrmaı «ash qulaqtan tynysh qulaq» júretin orynbasarlardyń irili-usaqty mekeme sharýashylyqtardan bastap, aýdan, oblys, tipti respýblıkalyq deńgeıde jıi kezdesetini sondyqtan. Bul — aldymen adamnyń uıattylyǵyna, qandaı iske de jany aýyratyn adamgershilik parasatyna, iskerligine baılanysty. Aptalyq, aılyq kýrstardan qansha ret ótkizip alsań da, qabiletsiz, ıkemsiz adamnan kóregen, bilgir qyzmetker shyǵa qoıýy qıyn-aq. Kimniń nege qabileti baryn bilip almaı, jastaı daıyndamaı, basshy kadrlardy ómir joly toltyrylǵan qaǵazǵa qarap irikteý sekildi saıasattyń túp tamyrymen qateligi qanshama jyldardan beri shaǵyn sharýashylyqtan bastap, búkil qoǵamdy súrindirip keledi. Sonda da bul júıe taramystaı sozylyp, ómirimizdiń býyn-býynyn áli matap otyr.

Aqyn-jazýshy degen — ózine dert tilep alyp júretin halyq: eldikti, qazaqtyń qanyna sińgen adamdyq, kóregendik, aqylmen oılap is etý sekildi qasıetterdi qaı azamattan baıqaı qalsa, soǵan dalıyp, búkil qazaq aqyldy bolyp ketkendeı qýanady. «Anaý oblystyń pálen degen aýdanynyń túgen degen mektep dırektory bar eken — naǵyz azamat, halyqqa tulǵa bolar jigit dep sony aıt!» — dep, bir-birine qýana habarlap, súıinshi surasyp ábigerlenedi. Jaqsy-jaman bolsa da, biz de sol kóp jazǵyshtyń bireýimiz — aqsha qýǵan, kúni túsetinderden basqaǵa kózi túspeıtin pysyqtardyń zamanynda kókireginde jylt etken oıdyń sáýlesi bar ul men qyzdy qazaqtyń qaı aýylynan kórsek te, ólgen ákemiz tirilip kelgendeı bolamyz da qalamyz.

Raqysh sińilimiz óz deńgeılesteriniń arasynda alǵyr basshy ekenin, sózinen isi kóp, julqynyp alǵa shyǵyp, «myna sharýany men tyndyryp jatyrmyn!» — dep kózge túsýge uıaty jibermeıtin, halqymyzdyń eldik namysyn óz qamynan bıik qoıar azamat ekenin Ulytaý jerinde onyń janyna ergen shuǵyl saparlarymyz kezinde baıqaǵanbyz.

Birde, jazýshylar Káribaı Ahmetbekov, Beksultan Nurjekeev jáne men — úsheýmiz Jezqazǵan qalasyna oqyrmandarmen kezdesýge úsh kúndik saparmen bardyq. «Ulytaýdy kórmesek, Jezqazǵanda bolyp edik deýimiz uıat, Fake, obkomǵa aıtyp, kólik surap alyńyz», — dep álgi eki baýyrym meni qaırap qoıady. Halqymyzdyń eldik týyn kótergen tuǵyry Ulytaýǵa barý, Edige men Toqtamystyń basyna taǵzym etý ózimniń de kópten bergi armanym edi.

Oblystyq Partıa komıtetiniń bosaǵasynan ótý de qıamettiń qyl kópiri eken. Oblys basshysy Davydovtyń kez-kelgen keıýana kelimsek basa-kóktemesin degen jarlyǵy bolsa kerek — ıdeologıa bóliminiń nusqaýshysy qarsy alǵannyń ózinde bosaǵadaǵy mılısıa qyzmetkerleri «kimsińder sender!» degen keıippen áreń jiberdi. Bólimdegiler «mashına jaǵy qıyndaý edi, anaý edi, mynaý edini» tizbekteı bastaǵasyn, buryn komsomolda istegen kezinen júztanys edi dep hatshy Syrym Saparǵalıevqa kirip, áreń degende Ulytaýǵa baratyn mashına surap alǵanbyz.

Sol jyly Raqyshty birinshi kórgem: muǵalimderdiń tamyzdaǵy aýdandyq jıynyn ótkizip jatyr eken, bastalyp ketkenine qaramaı, men de qatynastym. Óńi juqaltań, taldyrmash kelgen qyz bala sóılep tur.

...Ulytaýda tek qazaqtar turady, óıtkeni jan rahatyn izdep, júkterin arqalap keletin basqa ult ókilderi aqsha jınap, qos-qos mashına alyp, arqalap kelgen júkterin artyp ketetindeı molaıtatyn mekenderge ǵana jaıǵasady. Ulytaýda ondaı aǵyl-tegil baılyq, shashylyp jatqan aqsha nemese otyn úıde, sý úıde — jumystan kelgende eki qoldy jyly sýǵa malyp otyrar jaıly jaǵdaı joq. Biraq qashan jer aýdarylǵansha, jurt aýdarar qazaq ta joq. «Qazaq mektepterinde oqyǵandardyń ınabat, uıaty bolǵanmen, dúnıetanym, bilim deńgeıleri orys mektebin bitirgenderden tómen» degen pikir bar. Bul bireýdiń jáıdan-jáı aıta salǵan sózi emes. Munyń túbinde shyrqyraǵan shyndyq jatyr. Bul shyndyqtyń qatparly, qaltarysty sebepteri kóp bolýy kerek. Biraq ár muǵalim men halyqty tárbıelep otyrmyn, erteńgi kúni halyq azamattarynyń qandaı bolýy meniń búgingi eńbegime ǵana baılanysty degen oıdy bir sát te esten shyǵarmaýy kerek-aq...

— Bul kim? — dedim sózine súısingenimnen shydaı almaǵan men aýdandyq Mádenıet úıi zalynyń sońǵy qatarynda otyrǵan kóp muǵalimniń birinen.

— Aýdandyq atqarý komıteti tóraǵasynyń orynbasary Raqysh Ydyrysova...

Aýdannyń ár sharýashylyǵynda sút daıyndaıtyn kýhná, malshylar úshin qazirgi zamanǵa laıyqtap salynǵan monshe bar eken. Mektep balalaryna 200 gramnan tegin sút beriledi. Bul — respýblıkamyzdaǵy Ulytaý sekildi ylǵı qazaq mekendegen aýdandardyń kóbinde álgi kúnge deıin júıeli arnaǵa túspegen jaǵdaı. Birde elektr joq, ekinshi kúni sý joq, úshinshi kúni monshashy aýyryp qalyp, áıteýir súrinshek attaı kibirtiktep kele jatqan jaı.

Ulytaý — kıeli meken. Aıaq bassań, tarıhı oryn. Biraq mal, egin, shóp dep júrgende, kez-kelgen basshy ótken-ketken ómir túgili, kúni keshe ózekti másele bolǵan jáıdiń bárine kóńil aýdaryp, bas qatyra bermeıdi, Qazaq halqynyń mádenıeti, ǵylymy, ádebıetiniń tarıhynda ózindik orny bar biraz azamattar osy Ulytaý aımaǵynda týyp, tárbıe, bilim alǵan. Tipti ár aýylǵa bir mýzeı turǵyzsa da, artyq etpeıtindeı. Muqametjan Qarataev, Baýbek Bulqyshev, Muqan Imanjanov, Tóregeldi Sharmanov, Qamal Smaıylov... — el namysyn tý etip qansha azamat shyqty?! Alashahan, Joshyhan zırattary da osyndaǵy «Sarykeńgir» sharýashylyǵynyń terıtorıasynda. «Sarykeńgirdegi» dırektor Ábiljan Súleımenov te — kóregendigi, iskerligi jóninen qazaqtyń bolǵan-tolǵan zamandarynan qalǵan jaqsylarynyń kózindeı adam. Ádebıetińizdi jańǵaqsha shaǵady. Sharýashylyqta júrgen edbekkerlerden bastap, tehnıka, ǵylym salasyndaǵy zıaly azamattar, tipti muǵalimderge deıin aýyzǵa sháınap berer dúnıeler bolmasa, shyn mánindegi kórkem shyǵarmanyń tereńine boılaı bermeıdi. Kóbine laı sýdyń betindegi qaltqydaı, árkimniń pikiri boıynsha ólshep-piship júrisedi. Ábekeń tarıhı nemese ádebı kitap sekildi: qazaqtyń dalasyn aldyna jaıyp qoıady da, ádebıeti men mádenıetin, ómiri men tirshiligin, aqyny men jyraýyn, hany men bıin, batyry men baqsysyn — túgel aıtyp berýge bar. Jezqazǵan jerine kelgen jolaýshynyń deni derlik Ulytaýǵa, onyń ishinde «Sarykeńgirge» Joshyhan, Alashahan zırattaryna soqpaı ketpeıdi. Ábekeń keıbir basshylardaı sharýa bar dep syltaý tabýǵa tyryspaı, nemese orynbasaryn jibere salmaı, bárin ózi qabyldaýǵa tyrysady, mán-mańyz berýge daǵdylanǵan.

«Qarakeńgir» sharýashylyǵynyń dırektory Álipbek Beketaev ta — el aǵasy bolýǵa ábden laıyq adam. Basshy ataýlynyń kóbi malyń túgel me, jem-shóbiń bar ma, eginińnen qansha ónim alasyń degen suraq-talaptardy ǵana biledi. Mal baǵyp, egin ekkenderdiń rýhanı jan dúnıesinde ne bolyp jatyr, turmys-tirshiligi, úı-jaıy, bala-shaǵasynyń jaǵdaıy qalaı — bul olar úshin mańyzsyz máseledeı. Tipti bala-shaǵasynyń amandyǵyn surasań, birtúrli yńǵaısyzdanyp, «úkimettiń jumysy turǵanda, bala-shaǵany suraǵany nesi» degendeı syńaı baıqatady. Álekeń qaı sharýashylyqta júrmesin, áýeli ár semányń jaı-kúıinen, aýyldyń mádenıetinen bastaıdy. Ónerge, sportqa basty mán berilgen jerde, jastar arasyndaǵy bylǵańbaı bos júris, tóbeles, qyrǵıqabaqtyq sekildi kórinister bolmaıdy deıdi. Amangeldi atyndaǵy sharýashylyqta birneshe jyl dırektor boldy, halyq teatryn uıymdastyrdy. «Qarakeńgirge» kelgeli de biraz is tyndyrýda. Aýdanda otyryp alyp aýzyńmen oraq orǵanmen, istiń sheshiletin túıini sol sharýashylyqtarda ǵoı.

Qazir qaı jerge barsań da, aýdannyń birinshi basshysynan basqany kózge ilmeıtin, orynbasarlardyń pikirine shekesinen qaraıtyn bastyqtarǵa jıi ushyrasatyn boldyq. Birinshi basshynyń emeýrininsiz qybyr etetin ákim-qara ilýde bireý.

— Bizdegi sharýashylyq, mekemelerde mánis biletin, jón biletin basshylar, — deıdi Raqysh Náshkenqyzy, meniń kereǵarlaý pikirlerimdi kúlimsireı tyńdap. — Kóbi jastar, usynys aıtsań, útir, núktesine deıin qoıyp berińder dep otyrmaıdy — ári qaraı ózderi ilip áketedi.

«Sheńber» sharýashylyǵynan bir ana hat jazypty. Bes balasy bar. Kúıeýi qaıtys bolǵan. Ózi jalǵyzilikti, bólimshede turady. Balalarynyń kıinip-ishinýine aılyǵy jetpeıdi. Hatty oqyp shyqqanda, Raqyshtyń óz ómir tarıhy kóz aldynan ótip, júregin dir etkizgendeı boldy.

«Sheńber» óziniń týǵan jeri. Sonyń «Qurylys» degen qystaǵynda dúnıege kelipti. Aınala taýly-tasty, ózen, toǵaıly jer. Aýyl syrtyna shyqsań, búldirgennen aıaq alyp júrgisiz edi. «Torǵaı» degen ózeni bar. Raqyshtyń bala kezinde bul óńir qorǵasyn shyǵatyn kádimgi kenish bolatyn. Biraq ónimi az boldy ma — áıteýir qorǵasyn tasıtyn temir jol salynbaı, aqyry keıinnen kenish jabylyp qaldy. Ákesi Náshken jastaı dúnıe saldy. Anasy Hadısha ismer kisi edi. Birer malyna qosymsha, elge palto, beshpet tigip, shıetteı segiz balasyn asyraǵan. Tipti oqýlaryn kem etpeı, bilim de bergen. Ol kezde jıýly baılyq bolmasa da, adamdar qazirgiden góri meıirimdileý sekildi edi. Jan dúnıeleri keń, bir-birine degen janashyrlyǵy da mol bolatyn. Bir oshaqtyń qaıǵysyn, taýqymetin aýyl bolyp kóterisetin. Qazir qalaǵa nemese astanaǵa bara qalsań, janushyryp, sirkeleri sý kótermeı júrgen bireý. Osy qulyq aýylǵa da jaqyndap qalyp júr-aý. Álgi kelinshektiń hat jazýy da tegin emes. Baıaǵy zamanda el ishinde otyrǵan mundaı semálar kómektesińder dep aýdanǵa habar jibermeıtin. Qazirgi aýyldarda da eshkimniń eshkimmen isi bolmaı barady. El ishi ǵoı — ashtan ólip, kóshten qalmaspyz degen qazaqy uǵymǵa dál búgin senim arta qoıý qıyn.

Basqa, basqa, shıetteı sábılerdi azamatsyz ósirýdiń ne ekenin Raqysh jaqsy biledi. «Egindi» sharýashylyǵynda kombaın, traktor bólshekterin qamtamasyz etý jumysynda júrgen aǵasy Amanaı qaladan júk mashınasymen motor jáne basqa qajetti zattardy alyp kele jatyp, qatty jańbyrdyń astynda, ózi rúlde kele jatyp, mashınasy saıǵa taıǵanaǵanda kýzovqa tıelgen motor kabınany basyp qalyp qaza bolǵan. Eginniń qyzǵan kezi bolatyn. Oraqtyń kezinde eki kombaın birdeı tur, qalaı da jabdyqtaryn jetkizýim kerek dep ertemen attanǵan Amanaıdyń sol kúni keshte súıegin ákelgende, úıelmeli-súıelmeli alty sábıimen aıaǵy aýyr kúıinde qalǵan jeńgesi Rozany jurt adam bolmaıdy ǵoı beıshara dep edi. Sonda ishte qalǵan Dýman qazir on bir jasta.

Álgi kelinshektiń haty kóp oılarǵa ıtermeledi. Aýdandaǵy, sharýashylyq mekeme basshylarymen kezdesip, barlyq jerde osyndaı turmys jaǵdaıy qıyn semálardy arnaıy esepke alyp, kóńilden tys qaldyrmaýdy mindetti jumystaı júıege keltirgen durys bolar edi. «Sheńber» sharýashylyǵynyń dırektory Júsip Ýsabekov ózimen birge oqyǵan, túsinigi bar, oıly azamat.

Raqysh aýdandyq keńestiń tóraǵasy Serik Tileýbaıulyna kirip, álgi hattyń jáıin, sharýashylyqtardy aralap qaıtý kerektigin, Amankeldi atyndaǵy sharýashylyqta ótkeli otyrǵan «Qyryq birinshi jyldyń kelinshekteri» degen kitap oqýshylar konferensıasyna de qatynasatynyn aıtty. Jan tynyshtyǵynan ada bolǵan qazirgi zamanda kitap oqý da sırek qubylysqa aınalyp barady. Amankeldi sharýashylyǵynyń dırektory Jaqypbek Daıyrov telefon shalyp, «Sarylyq samaly» ansambliniń jańa repertýaryn tyńdap, kitap oqýshylar konferensıasyna qatynasýyn usynyp edi. Arǵy jaǵyndaǵy «Egindi» sharýashylyǵyna da soǵa kelgen durys. Aýdandaǵy táýir sharýashylyqtardyń biri — osy «Egindi». Dırektory Bitimbaı Bekmaǵambetov — kópti kórgen adam. Eshkimge bolmasyn demeıdi, peıili keń. Bir jerde basshy bolyp kóp otyrǵan keıbireýler bastyqtyqqa ábden eti úırenip, kóziniń aldy isinip, júregi maılana bastaıdy ǵoı. Bitekeń aǵamyzda mundaı maı basý aýrýy joq, jany juqa jan. Áli esinde, ótken jyly Bitimbaı aǵaı aýdandyq keńeske kelip:

— Egin, egin dep júrgende, aýyldyń mádenı jaǵyn esten shyǵaryp alǵandaımyz. Anaý Amankeldi, «Qarakeńgirde» halyq teatry ma, án-bı ansambli me — dýmandatady da jatady. Shynymdy aıtaıyn, meniń qolymnan kelmeıdi. Bizge ónerden habary bar bir jigit jiberińder, - degen. Sodan keıin aýdandyq keńes aýdandyq komsomol uıymynyń hatshysy, ánshi, ónerpaz jigit Murat Ábdýálıevti partıa uıymynyń hatshysy etip jibergen. «Ushyqtaı sala jazyldyń ba» demekshi, jas jigit sharýashylyqqa etene aralasyp, jan-jaǵyna qarasyn degeli biraz boldy. Endi kózben kórip qaıtpasa bolmaıdy.

Aýdannyń ár shoqysyna deıin Raqyshqa jaqsy tanys: týyp-ósken jeri, qaı sharýashylyqtyń jaǵdaıy qandaı deńgeıde — bári alaqanynda. Mektepte, qazaqtyń qyzdar pedagogıkalyq ınstıtýtynda oqyp júrgende, partıa, keńes qyzmetkeri bolý oıyna da kelgen emes. Bul salaǵa ketýine sebepshi bolǵan — 1980 jyly Ulytaý aýdandyq partıa komıtetiniń birinshi hatshysy bolyp kelgen Jamanqul Shaıdarov degen azamat.

Ol kisi kelisimen, qaı jerde Ulytaýdan shyqqan ul-qyzdar bar — solardy izdeńder, jergilikti kadrlardy kóterýimiz kerek degen prınsıp qoıdy. Raqysh ol kezde muǵalimderdiń bilimin jetildirý bóliminde, Jezqazǵanda jumys isteıtin. Munyń oıly, tyndyrymdy qasıetterin osy jumysynda baıqaǵan Kúlpan Nurǵalıqyzy Ulytaý aýdandyq partıa komıtetiniń ózi basqaratyn ıdeologıa bólimine nusqaýshylyqqa shaqyrdy. Aýdandyq partıa komıtetiniń ıdeologıa jónindegi hatshysy Kúlásh Muhtarqyzy Dúısembaeva óte talap etkish tárbıeshi boldy. Onyń ústine, birinshi hatshy Jamanqul Shaıdarov ıdeologıa salasyna qatty kóńil bóletin. Kórkemónerpazdardyń aýdandyq úıirmelerine ázirlikterin ár senbi saıyn ózi qatynasyp, kóretin. Aýyldy kógaldandyrý, senbilikter uıymdastyrý, qazaqtyń salt-dástúrlerin turmysqa engizý -birinshi basshy osynyń bárin ózi qadaǵalap otyratyn. Shaıdarovtan keıin birinshi hatshy bolyp kelgen Saǵadat Dúısebekov te ıdeologıaǵa úlken mán berdi. İskerlik, uıymdastyrǵysh qabilet, neni bolsa da sońǵy núktesine deıin jetkizý sekildi qasıetterge tárbıelegen osyndaı basshy aǵa-apalar.

İrili-usaqty is-sharalardy áıteýir ótkize salý bar da, mándi, kelisti etip, qatysýshylardy shen-shekpen, laýazymyna qarap bólmeı, árqaısysyna kóńil bólip, oıdaǵydaı ótkizý bar.

1989-jyly Ulytaý aýdanynyń jarty ǵasyrlyq toıy ótkizildi. Men de sol merekege qatynasyp, eldiń qýanyshty sátterine kýá bolǵanym bar edi. Sýy tapshy, sharýashylyqtary shalǵaı, Ulytaý sekildi mal baqqan elge qazirgi jetpestik zamanynda toı ótkizý ońaı sharýa emes. Sol joly Máskeýden, Almatydan shaqyrylǵan qonaqtar úsh júzdiń basyn qosyp, eldiktiń týyn kótergen zamandaǵydaı sán-saltanattyń kýási bolyp edi.

Raqyshtyń úndemeı júrip, kóp isti tyndyratyn azamat ekenin sol joly baıqap elý jyldyq tarıhy ǵana emes, sonaý qazaqtyń el bolyp tý kótergen kezinen bergi shejirelerdiń bári kınonyń kadrlerindeı kóz aldymyzdan ótken. Árbir sharýashylyqtyń ónerpazdary, aıtysker aqyndary eki kún boıy kónekókirek Ulytaýdyń baýraıyn dýmanǵa bólegen.

Toı ótkizý — elge syn. Qazaqtyń ejelgi jol-jora, salt-dástúrin ótkizýdi umytqan halyqtyń búgingi urpaǵyna eki ese qıyndyqtar júkteledi. Keı jerlerde ashyp-shashyp toı jabdyǵyn tókkenmen, uıymdastyrýdaǵy, tamaqtyń moldyǵymen ólshenbeıtin kóńil men mán-mánis tóńiregindegi orasholaqtyqtar jurttyń yqylasynan shyǵa bermeıdi. Bul rette Ulytaýlyqtar jer jaǵdaıynyń qıyndyǵyna, ekonomıkalyq múmkindikteriniń tapshylyǵyna qaramastan, halqymyzdyń ata-babalar zamanynan qalǵan dástúrlerin qaz-qalpynda jalǵastyryp keledi.

Ulytaý aımaǵynyń da kókala úırekterin ushyrǵan kólderi tartylyp, bir kezdegi sholpydaı syldyraǵan bulaqtary soqyr kózden shyqqan tamshydaı sýalyp, ǵaryshty ıgerýshilerdiń otty quraldarynyń sharpýynan sıreı bastaǵan orman-toǵaılary seldirep, kóz aldymyzda kórkinen aırylyp barady. Qysy qatty, ári uzaq. Jazy ystyq. Jańbyry da sırek.

Ulytaý — halqymyzdyń ómirbaıan shejiresiniń aınasy. Onyń ár tasyn, ár butasyn tarıhymyzdaı qasterlep, urpaqqa kórseter mýzeı-aımaqqa aınaldyrýǵa aýdannyń jaǵdaıy kelmeıdi. Bul — el, úkimet bolyp oılastyrylýǵa tıisti jaı.

Al, Ulytaýda eńbekke, beınetke toly ómir bar. Armany bıik, joly buralań, jany adal adamdar bar. Qarapaıym, qaıyrymdy, kedeı adamdar. Olar qulazyp jatqan qasıetti aımaǵymyzdyń tirshilik tamyryn jalǵastyryp júr. Ataq úshin, jaqsy kóriný úshin emes. El men Ardyń aldyndaǵy perzenttik paryzdaryn óteýde. Solardyń biri — Raqysh Náshekenqyzy Ydyrysova.

1991.

---