InfoHub Logo

Қазақстандағы медицина саласының жетістіктері мен кемшіліктері қандай? Өткен жылы бір миллионнан астам операция жасалғанымен, неге қазақстандықтардың өмір сүру ұзақтығы Еуропадан артта қалып отыр? Бұл туралы белгілі дәрігер және денсаулық сақтау менеджері Эрик Байжұнысов өз ойымен бөлісті.

Бұл туралы Infohub.kz ақпарат агенттігі хабарлайды.

Медицинамыз қалай дамыды?

Қазақстандықтардың өмір сүру ұзақтығы 76 жасқа жуықтады. Бұл көрсеткіш әлемдік деңгейде орташа болғанымен, Еуропа елдерімен (81 жас) немесе Жапониямен (84 жас) салыстырғанда төмен. Дегенмен, соңғы 30 жылда медицина саласында айтарлықтай жетістіктерге қол жеткізілді. Кардиохирургиялық бөлімшелер ашылып, жүрекке жасалатын операциялар саны артты. Бұрын өлімге апарып соғатын аурулар қазір емделіп, адамдар қалыпты өмір сүруде.

Қазақстандықтар қандай аурулардан көз жұмады?

Өткен жылы 133 мың адам қайтыс болды. Олардың басым көпшілігі жүрек-қан тамырлары (29 998 адам) және жүйке жүйесі (23 728 адам) ауруларынан қайтыс болған. Бұл инфаркт пен инсульттің жиі кездесетінін көрсетеді. Күніне шамамен 150 адам инфаркт, 134 адам инсульт диагнозымен ауруханаға түседі. Әсіресе, ерлер арасында ерте қайтыс болу қаупі жоғары.

Қазақстан медицинасының парадоксы

Елімізде миллионға жуық адам артериалды гипертензиямен есепте тұрса, шын мәнінде бұл көрсеткіш әлдеқайда жоғары болуы мүмкін. Онкологиядан жылына 13 886 адам қайтыс болады. Бұл аурулардың көбеюіне өмір салтымыз бен тамақтану дағдыларымыз әсер етеді.

Неге ауырамыз?

Аурулардың 50 пайызына біздің өмір салтымыз себеп болады. Қазақстандықтардың көпшілігі аз қимылдайды, балалар гаджеттерге тәуелді. Дұрыс тамақтанбау, артық тұз тұтыну, темекі шегу және алкогольді асыра пайдалану – мұның бәрі аурулардың өршуіне әкеледі.

Жағдайды қалай өзгертуге болады?

Денсаулықты сақтаудың ең қарапайым жолы – күнделікті жаяу жүру. Күніне 7 мың қадам жасау жүрек ауруларының алдын алуға көмектеседі. Сондай-ақ, мемлекет тарапынан қантты сусындарға акциз енгізу, фастфудқа салықты арттыру сияқты шаралар арқылы денсаулықты жақсартуға болады. Айналадағы қоршаған ортаның тазалығына да мән беру қажет.

Өз денсаулығымызға жауаптымыз ба?

Ең бастысы – әрбір азаматтың өз денсаулығына деген жауапкершілігі. Скринингтерден өту, дәрігердің нұсқауларын орындау, зиянды әдеттерден бас тарту – бұл әркімнің өз қолында. Мемлекет, бизнес және азамат арасындағы келісім-шарт сияқты денсаулықты сақтаудың нақты ережелері болуы тиіс.