InfoHub Logo

20 жыл бұрын, 11 ақпанда мемлекет және қоғам қайраткері Алтынбек Сәрсенбаев, оның күзетшісі Бауыржан Байбосынов және жүргізушісі Василий Журавлев қаза тапты. Осы датаға орай саясаткердің жақындары жаңа мәлімдеме жасап, істі қайта қарау мәселесін көтерді.

Бұл туралы Infohub.kz ақпарат агенттігі хабарлайды.

Сәрсенбаевтың туыстары Қазақстан Республикасының Бас прокурорына қылмыстық істі «жаңадан ашылған мән-жайлар» негізінде қайта жандандыру туралы өтініш жолдады. Олар тергеу мен сот барысында өрескел заңбұзушылықтар болғанын және кейбір маңызды жайттарға тиісті баға берілмегенін айтады.

Өтініштің мазмұнында іс материалдарына қатысы бар аудиожазбаға сілтеме жасалған. Жазбада Нұрсұлтан Назарбаевқа тиесілі делінген: «Іс бойынша бәрі дәлелденген, алаңдаудың қажеті жоқ, бір айдан кейін сотқа беріледі, халық бүгін айтады да, ертең ұмытады» деген сөздер бар.

Сәрсенбаевтың жақындары бұл жайт сот үкімінің алдын ала белгіленгенін меңзейді. Олардың айтуынша, сот басталмай тұрып-ақ шешім қабылданып қойған, ал сот процесі тек қоғам назарына арналған көрініс болған.

Назарбаевты жауапқа тарту талабы

Туыстар бұл аудиожазбаның өзі үкімді қайта қарауға негіз бола алатынын алға тартады. Олардың пікірінше, осы мәселе бойынша Қазақстанның Тұңғыш Президенті Нұрсұлтан Назарбаев жауапқа тартылуы тиіс.

Сәрсенбаевтың жақындары бұл қылмысты «саяси террор актісі» деп бағалап, экс-президенттің отбасы мүшелерін де қылмыстық жауапкершілікке тарту мәселесін көтерген.