InfoHub Logo

Фасилити менеджмент – дәстүрлі түрде ерлер басымдық көрсететін сала. Мұнда ірі келісімшарттар, банктер мен бизнес-орталықтардан бастап мұнай өңдеу зауыттарына дейінгі күрделі нысандарды басқару қамтылады. Бұл салада ойын ережесін көбіне ерлер жазады, кейде сыбайлас жемқорлық пен «қалтаға» ақша салу сияқты сұр схемалар да кездеседі. Ақмарал Имашева мұндай жолдан бас тартып, өзінше өрледі.

Бұл туралы Infohub.kz ақпарат агенттігі хабарлайды.

Кәсіпкерлікке бет бұру

30 жасында, 10 жылдық жұмыс өтілінен кейін, екі баланың анасы бола тұра, Ақмарал «шыны төбеге» соғылып, тұрақты жұмысын тастап, жеке үйлерді тазалаудан бастап өз бизнесін құрды. 2007 жылы Алматыда жаңа тұрғын үй кешендерінің құрылысы қарқын алғанда, «жөндеуден кейінгі тазалық» қызметіне сұраныс артты. Алайда, тапсырыстар тұрақсыз және маусымдық болып шықты. Бір жылдан кейін стратегияны өзгертіп, корпоративтік секторға шығу қажеттігі туындады.

Top Service Group – бүгінгі жетістік

Бүгінде Top Service Group – Қазақстан бойынша жұмыс істейтін, 19 жылдық тәжірибесі бар, кәсіби командасымен және айқын мақсаттарымен ерекшеленетін тұрақты компания. Компания өнімін құруға, процестерді ретке келтіруге және ауқымын кеңейтуге көп жылдар арналды. 2024 жылы Ақмарал EY конкурсының «Әлеуметтік маңызы бар кәсіпкерлік» номинациясында жеңімпаз атанды. Қазылар алқасы оның нарықтағы беделі, мыңдаған қызметкерді басқаруы, еңбекқорлығы мен табандылығы, сондай-ақ әйел басшы ретінде үлгі болу рөлін бірауыздан атап өтті.

Балалық шақ пен алғашқы қадамдар

«Мен шағын ауылданмын, анам – мұғалім, әкем – дәрігер. Мектепте жақсы оқыдым, үй шаруасына көмектесіп өстім. Жоғары сыныптарда мамандық таңдау туралы ойланғанда, ұзақ уақыт шеше алмадым. Бірақ Алматыда оқығым келетінін анық білдім. Сол кезде экономистер мен заңгерлер сұранысқа ие болды. Университетке ақылы бөлімге түсіп, оқуымды төлеу үшін жұмыс істеуге мәжбүр болдым. 90-шы жылдары көпшілік осылай тіршілік етті, ата-анама жалақыны кешіктіріп, кейде заттай төлеп беретін. Еңбек етуді және қиындықтардан сескенбеуді үйреткен ата-анама алғыс айтамын. Олар қолынан келгеннің бәрін берді».

Алғашқы ірі клиенттер мен MBA

Алғашқы ірі клиенттерінің бірі – Aport сауда орталығы болды.

«Олардың тендеріне барып, неге мені таңдау керектігін түсіндіріп, презентация жасағаным есімде. Тағдырдың жазуымен бе, әйтеуір мені және менің компанияма сенуге көндіре алдым. Сөйтіп, корпоративтік әлемге жолым басталды. Олардың даму жолымен бірге жүрдік, олар елдегі алғашқы ірі сауда орталығы болды. Кейін Альянс Банк пайда болды. Одан кейін тізім ұзара берді. Біз жұмысқа деген жауапкершілігіміз клиенттерге ұнайтынын түсініп, ауқымымызды кеңейттік. Бірақ тек қалау жеткіліксіз еді, менеджмент, қаржы, маркетинг және команда құру саласында білім қажет болды. 2010 жылы кәсіпкерлерге арналған MBA бағдарламасына оқуға түстім. Компанияны 5 жылға дамыту стратегиясы бойынша диплом қорғадым. Жоспардың 99% орындалды. Бұл – алғашқы жеңіс».

Қызмет көрсету ауқымы және компания философиясы

Бүгінде компания бүкіл ел бойынша нысандарға қызмет көрсетеді: банктер, сауда үйлері, бизнес-орталықтар, сондай-ақ қауіпсіздік талаптары жоғары өнеркәсіптік алаңдар.

«Біз клиенттеріміздің табысына үлес қосып, олардың негізгі қызметіне қолайлы санитарлық-эпидемиологиялық жағдай жасап жатқанымызды мақтан тұтамыз».

Компания қызметтерінің кең спектрін ұсынады: кәсіби клининг, арнайы киімдерді жуу және жөндеу, санитарлық-техникалық және электр-техникалық жұмыстар, персоналды тасымалдау, ресепшн және әкімшілік қызметтер, сондай-ақ инженерлік желілерді техникалық қолдау.

Сыбайлас жемқорлыққа жол бермеу

Top Service Group сыбайлас жемқорлыққа жол беретін тендерлермен жұмыс істемейді.

«Ұсыныстар көп рет түскен. Бірақ мен әрқашан бас тартамын. Әйелдер ерлерге қарағанда аз тәуекел ететін шығар, бірақ бұл тек тәуекелге байланысты емес. Менің ойымша, әйелдер әлдеқайда ұқыптырақ және өз мақсаттарына жету үшін басқалардың басынан аттап өтуге бармайды. Жеке өзім жасаймын, жұмысымнан рахат аламын. Ең жақсы жарнама – риза клиенттер деп санаймын, ауызекі сөз жақсы жұмыс істейді. Біз сапаға, жауапкершілікке және сенімге баса назар аударамыз. Клиенттерге таза беделі бар, тұрақты серіктес қажет. Біздің тапсырыс берушілеріміздің 50%-дан астамы – көп жылдық әріптестеріміз, және біз мұндай сенімді жоғары бағалаймыз».

Команда – табыстың кілті

Ақмарал табыстың басты факторы ретінде команданы санайды.

«Біздің басты назарымызда – адамдар: клининг қызметкерлерінен, аула сыпырушылардан, сантехниктерден, электриктерден бастап менеджмент құрамына дейін. Қызметкерлеріміздің 5, 10 жыл және одан да көп жыл жұмыс істейтінін мақтан етеміз. Біздің міндетіміз – бизнес-процестерді дұрыс ұйымдастыру ғана емес, сонымен қатар жұмыс берушінің міндеттемелерін уақтылы орындау – жалақыны кешіктірмей төлеу, әлеуметтік пакетпен қамтамасыз ету, оқыту, эмоционалдық тұрақтылықты қалыптастыру, қаржылық сауаттылықты дамыту және тіпті өзіндік құндылықты арттыру. Олар үшін тұрақтылық – артықшылық емес, қажеттілік. Біз елімізде жұмысшы мамандықтарының еңбегін құрметтегенін қалаймыз және өзімізден бастаймыз».

Команданың басым бөлігі – әйелдер, оның ішінде көпбалалы аналар мен зейнеткерлер бар.

«Өкінішке орай, клининг қызметкерінің кәсібі әлі де беделді емес және жоғары жалақылы емес. Біз үнемі оның маңыздылығын қалай арттыруға және сапаны төмендетпей, физикалық ауыр еңбекті қалай жеңілдетуге болатынын іздейміз. Соңғы кездері бәрі роботтандыру туралы айтады, мүмкін болашақта роботтар бізді алмастырар, бұл бір жағынан қызық, ал әзірге түсініксіз».

Ақмарал бизнес-қоғамдастыққа белсенді қатысады. 2016 жылдан бастап ЕҚДБ-ның «Әйелдер бизнесте» бағдарламасында, мұндағы кәсіби кеңес беру компанияның өсуіне көмектеседі.

«Біз білім аламыз және өзімізді толықтырамыз, ал ыдыс толған кезде – бөлісгіміз келеді. Мен мұны қуана-қуана жасаймын».

Келесі жылы компанияға 20 жыл толады – бұл жаңа шешімдер мен икемділікті талап ететін маңызды белес.

Әйелдердің бизнес әлеміндегі рөлі

Фасилити компаниялары арасында Ақмарал Имашева – әйел-негізін қалаушылардың бірі.

«Ерлермен бәсекелесу оңай емес – олардың ойын ережелері қатал. Бірақ әйелдер де ірі бизнесті кем емес басқара алады. Бізде де сондай ми және сондай, тіпті одан да көп жауапкершілік бар».

«Біздің миссиямыз қарапайым: сенімді серіктес болу, жан мен жоғары жауапкершілікпен қызмет көрсету. Біз қазақстандық бизнес пен инвесторлардың тазалық, қауіпсіздік және тәртіп бойынша ешқандай кемшіліксіз халықаралық стандарттарға сай фасилити менеджмент қызметін алуын қалаймыз».

Оңай берілуге болатын күрделі салада Ақмарал бизнесті тұрақты, ашық және кәсіби түрде құруға болатынын дәлелдеп отыр. Көп жылдық келісімшарттар, мықты команда және нарықтың сенімі мұны растайды.