InfoHub Logo

Ақын, халықаралық «Алаш» сыйлығының иегері Ақұштап Бақтыгереева белгілі айтыскер ақын Мұхамеджан Тазабектің Орал қаласында өтетін кездесуіне қарсы шықты. Ақын бұл шараның ұйымдастырылуына және оның діни ағымдармен байланысына қатысты алаңдаушылық білдірді.

Бұл туралы Infohub.kz ақпарат агенттігі хабарлайды.

Кездесуге қатысты алаңдаушылық

Ақұштап Бақтыгереева өзінің «SOS! ОРАЛЫМ, МЕНІҢ, ОРАЛЫМ!» деп атаған мәлімдемесінде Мұхамеджан Тазабековтың Қайрат Сатыбалды және Бекболат Тілеуханмен байланысы бар екенін айтып, оның Оралдағы Қадыр Мырза Әлі атындағы орталықта өтетін кездесуіне қатысты сұрақтар қойды. Ақын бұл орталықтың мемлекеттік мекеме екенін, жекеменшікке өтіп кетпегенін және мұндай шараға рұқсат берген тұлғалардың кім екенін анықтауды талап етті.

Президент Жарлығы мен діни ағымдар

Мемлекет басшысының 16 мамырда кітап оқитын ұлт болу туралы Жарлыққа қол қойғанын еске салған ақын, Қадыр Мырза Әлидің кітаптарын насихаттауға тырысып жатқанда, керісінше, діни ағымдарды насихаттайтын тұлғаның келуін түсінбейтінін жеткізді. Ол Мұхамеджан Тазабековтың «құбылыс» атанған айтыскер ретінде танымал екенін, бірақ оның сөздерінің жат діни ағымдарды насихаттауға ұласып кетуінен қауіптенетінін айтты.

«Айтыс – бизнес»

Ақын Батыс өңірінде сан түрлі діни ағымдардың бар екенін ескертіп, мұндай кездесулердің қандай саясат пен үгіт-насихатқа толы екенін саралады. Ол айтыстың бүгінде «бизнеске» айналғанын айтып, адамдарды кездесуге барып, өздері шешім қабылдауға шақырды. Ақын «Тәңірші болу, салафит болу, ақ жамылу, қара жамылу, талақ болу, суайт болу, зымиян болу – өз еркіңіз ғой» деп, адамдардың діни сенімдері мен таңдауларына ерік беретінін меңзеді.